" Ch'idda siga culturali, linguistica, o ancu aculugista, a durabilità hè in cori di a noscia
strategia pulitica. Vulemu custruì i cumunità durabili inseme à un' Auropa durabili ". ALE
U 6 di ghjugnu, una diligazioni
di u P.N.C. scuntraia u
prisidenti di a cumissioni
aurupiana, José Manuel Barroso, pà
parlà di u prublema di a surtita di a
Corsica da l'ubbiettivu numaru unu.
Pocu tempu fà, l'esecutivu di
l'Assemblea righjunali cunduttu da
Anghjulu Santini s'era dinò spiazzatu
pà piattà a rispunsabilità maiori di u
guvernu francesi ind'è issa situazioni
di surtita.
Issu scontru impurtantissimu hà permissu
di spiegà bè à l'attuali prisidenti
Barroso a rialità di un populu
nigatu in tutti i so dritti, à un mumentu
induvi a maiori parti di l'identità
specifichi sò più o menu ricunnisciuti
in Auropa. Ci voli supratuttu à sapè
chì issu scontru hè statu parmissu pà
via di l'Allianza Libara Aurupiana.
L'Allianza Libara Aurupiana hè nata
in Brussela in u 1981.
U so scopu maiori hè di luttà pà i dritti di i populi
nigati è più particularmenti pà u
so drittu à l'autoditirminazioni.
Ci voli dinò à sapè chì l'Allianza hè
cumposta di 32 partiti pulitichi, t'hà
cinqui aurodiputati è chì dipoi 2004 hà
u statutu di partitu puliticu aurupianu.
In 1984, trè membri di l'Allianza
Libara Auropiana, i diputati di a Volksuni,
Jaak Vandemeulebroucke è
Willy Kuijpers, è Mario Melis di u
Partitu Sardu d'Azzioni ani missu in
sesta cù l'aculugisti u gruppu
" Arcubalenu ". Dipoi l'Allianza hè
stata rinfurzata di furmazioni frà altri
u Partido Andalucista di l'Andalusia,
l'Esquerra Repubblicana di Catalunya
di a Catalunia, u Blocco Nacionalista
Gallego di a Galicia, u Partitu Sucialistu
di Mallorca di l'isuli Baleari, o u
Scottish National Party di a Scossa.
Oghji, pà via di i novi stati
ch'adiriscini à l'Auropa, altri cumunità
cum'è l'Ingrusi di a Rumania o i
Muravi di l'Allimania di l'est sò raprisintati.
Hé sempri in Brussela chì l'Allianza
chjarifichjeghja u so manifestu dicendu
bè chì l'A.L.E. militeghja pà " una
ricunniscenza piena è ghjusta di i
nazioni senza Stati d'Auropa ind'è u
quadru di l'ivuluzioni di a custituzioni
di l'Unioni Aurupiana ". Dici
dinò chì " u so naziunalisimu hè
prugressistu ", hè dinò " univarsali
ind'è l'affirmazioni di i dritti liati à l'autoditirminazioni,
dritti chì devini essa uguali pà tutti i populi ". Issu naziunalisimu hè ancu
" un ingaghjamentu
pà un sviluppu
durabili è pà u
rispettu di a diversità
culturali è
aculugica ".
L'A.L.E. faci soiu
a filusufia aculugista : " Ch'idda siga culturali, linguistica,
o ancu aculugista, a durabilità
hè in cori di a noscia strategia
pulitica. Vulemu custruì i cumunità
durabili inseme à un' Auropa durabili ".
Attualmenti u so prisidenti hè una
donna, Nelly Maes. Hè cunnisciuta pà
u so ingaghjamentu pà i dritti di l'omini,
di i donni, è di u so paesi flamandu.
Invitata di u ghjurnali "Arritti"
in marzu scorsu avia datu u so parè
nant'à l'Auropa : " Oramai I stati
rigruppati in l'unioni auropiana ani da
rinuncià à a so suvranità assoluta. Pa i
nazioni ancora duminati da issi stati,
hè un'avanzata impurtantissima ".
In u dibattitu nant'à a custituzioni
aurupiana, l'A.L.E. avia chjamata à
vutà si.
Ulivieru Sauli
