Hè venuta l'ora per a Corsica di stupisce
l'Auropa...
Dipoi quasi un annu, pianu pianu, u
muvimentu naziunale corsu si ricustruisce.
Sarebbe ora avà per Corsica
Nazione Indipendente di passà à un'altra
dimessione. Si mettenu in sesta in
ogni pieve di Corsica sezzione.
Vultanu vechji militanti, ghjunghjenu
giovani... Tocca à tutti issi militanti à
riflette avà à un novu prugettu di
sucietà.
Noi, indipendentisti, parlemu dipoi
quasi trent'anni di l'indipendenza di a
Corsica. È trent'anni dopu, si sente
sempre listessi discorsi di certi corsi
chì ùn volenu capisce l'impurtanza di
u nostru prugettu per a
Patria. Dice omu "sè no
simu indipendenti, chì emu
da fà ? Emu da manghjà e
castagne ?" Hè venuta l'ora
falla finita incù issi discorsi
di briaconi è di risponde à u
populu corsu, d'assicurà a
ghjente nant'à i nostri prugetti,
è di fà cullà u livellu di
i nostri dibattiti.
Ci vole à riflette à a sucietà
chè no vulemu per a
Corsica indipendente di
dumane, ind'è l'Unione
aurupeana. Quandu a
Cunsulta Naziunale hà lanciatu
u dibattitu nant'à carta
d'indentità naziunale, sò
stati intimuriti i nemichi di a Corsica.
Ma, nimu ùn hà criticatu e scelte di a
Cunsulta, perchè eranu scelte umanitarie,
in armunia incù tuttu ciò ch'ellu si
face in Auropa. Quandu emu fattu e
nostre scelte per pudè pretende à a
naziunalità corsa, emu fattu prova di a
nostra capacità à piglià e decisione
impurtante. Oghje ci vole à andà più
luntanu è cumincià à priparà l'indipendenza.
Partandu di ciò chì ferma di suvranità
à i paesi di l'Unione aurupeana, ci
vorebbe à apre ind'è e sezzione di
Corsica Nazione Indipendente, u
dibattitu per sceglie e grande linee di
u prugettu di a Corsica indipendente.
Corsica Nazione Indipendente pudarebbe
mette in ballu un cuntrastu per
scrive una sorte di custituzione chì
parlarebbe di tuttu ciò ch'ellu si pò
passà ind'è un Statu :
A fiscalità (l'impositi nant'à u guadantu
è l'altri impositi, e sfarente tasse...),
A ghjustizia (à l'usu americanu/inglese,
o à l'usu aurupeanu ?, u codice
penale è u codice di procedura penale),
L'ecunumia (cumu finanzà u Statu ?,
cumu urganizà a Securità suciale o u
sistema di e ritirate...),
U sviluppu culturale (criazione di
un'Academia di a lingua, rispettu di i
sfarenti parlà di a lingua corsa...),
U rapportu di u Statu incù e religione
(statu laicu, Statu catolicu, rispettu di
l'altre religione...),
E legge di prutezzione di u liturale (u
codice di l'investimenti),
I rapporti incù a Cumunità aurupeana,
i rapporti di u Statu corsu incù l'altri
paesi,
L'istituzione (regime parlamentariu o
presidenziale, una camara o duie, votu
à a pruporziunale o à a magiurità assuluta,
scrutinu numinale o liste d'omi,
parità o micca, durata si i sfarenti mandatti
elettivi, u votu di i furesteri...),
I prublemi di a sucietà muderna
(abortu, matrimoniu di l'omossessuali,
pulitica di l'immigrazione, pulitica di a
securità interna...),
Urganisazione amministrativa di u
paese (regione, dipartimenti, intercumunalità,
pieve o territorii ?),
Pulitica suciale (mantene di tutti i
vantaghji di i funziunarii, migliorazione
di a sorte di i più puvari, sulidarità
trà tutti i corsi...),
U sistema educativu (pianu di riacquistu
di a lingua, di a storia, u studiu
di a geugraffia corsa, piazza di u sport
ind'è u sistema educativu, piazza di
l'università),...
Stu travagliu pudarebbe esse messu
in ballu dinù da a
Cunsulta Naziunale.
Sarebbe una manera di
falla cunnosce è di dà
à a ghjente u laziu di
fassi scrive nant'à e
liste di a Cunsulta
Naziunale per participà
à tutti sti dibattiti.
Una volta chè u
muvimentu naziunale
avarà rispostu à tutte
ste quistione, sarà
prontu u prugettu di
sucietà o di custituzione
per a Corsica
Indipendente di dumane.
Tandu, stu prugettu
pudarà esse prisentatu
à u nostru populu. Una volta spiegatu
chì l'indipendenza di a Corsica ùn
vole micca dì ruvina, recessione ecunomica,
è uttoppia. Quandu i Corsi
avaranu capitu l'interessu di l'indipendenza,
ancu ecunomicu, tandu sarà
venuta l'ora per i rapresentanti di a
Cunsulta Naziunale di dichjarà l'indipendenza
di a nazione corsa è d'andà
à scuntrà l'ONU è l'Unione aurupeana
per demandà a ricunniscenza ufficiale
di u Statu corsu.
Tocca à tutti i militanti di u
Muvimentu Naziunale à riflette nant'à
stu testu.
Ghjuvan Filippu Antolini
