Natu in u 1998 in u rughjone bastiacciu di a
vuluntà cumuna di qualchì ghjòvanu arradicat'
à a so terra di fassi sente, u gruppu l'Attrachju
hà sappiutu diventà un attore maiò di u paisaghju
culturale corsu oghjincu. Eredi di una
tradizione cantata forta assai, ghjè per via di u cantu in
paghjella è u cantu sacru è prufanu chì e persone cumpunendu
a furmazione hanu principiatu à fassi cunnosce.
" Avemu sceltu u nome l'Attrachju perchè face rifarenza
à stu mumentu di a ghjurnata quandu, u lume lasciendu
piazza à l'oscurità, a ghjente si mettia in tondu à lu
fucone pè fà veghje. Custì, rivenianu annant'à a ghjurnata
scorsa ò cantavanu. Sò 'ssu galateu
è 'ssa cunvivialità chì ci hanu interessati
", spiega Tumasgiu Pasquali.
Utempu passendu, s'hè fatta
sente a voglia per i ghjuvanotti
- 25 anni di media - di
cumunicà à a ghjente i so
sìntimi persunali. Ghjè per
via di stu travagliu incù amichi pueti è
autori ch'hè esciutu, in u 2005, u discu
Passi di Vita, dendu un missaghju forte
assai à la ghjuventù di a nostr' isula,
quellu di micca perde i so razzini. Incù
canzone cum'è O Mà parlammi corsu ò Revoluzione, u
gruppu affirma custì un impegnu certu. Effettivamente,
si battenu per chì a cultura è a lingua ùn sianu micca
perse dumane : intervenzioni in scole bislingue, intervenzioni
à u centru culturale di l'università di Corsica per
l'insignamentu di a paghjella, a priparazione di un discu
di paghjelle à usu pedagògicu incù l'intervenzione di
parechji paghjellaghji cunnisciuti, è forse a creazione di
una scola di cantu l'Attrachju accessìbile à tutti, " perchè
a cultura hè un dirittu ch'ùn si pò micca ricusà à quellu
chì vole amparà. " spiega Ghjuvan' Matteu Alberghi.
Impegnu culturale, ma pulìticu dinù, postu chì
l'Attrachju, dipoi a so creazione, s'hè sempre mubilizatu
per i prighjuneri pulìtichi quand'ellu hè statu
chjamatu. D'altronde, certi membri di u gruppu
hanu dighjà deci anni di militantisimu daretu à elli.
Oghje, u gruppu si pripara à celebrà i so deci
anni d'esistenza cù l'elaburazione di un novu
dischettu per u 2008, " Vulemu dà, cù stu
discu, a nostra visione di a sucietà corsa oghjinca,
oppunendu testi muderni à una mùsica
più tradiziunale, cunfidanu, ùn vulemu micca rivive ciò
ch'elli hanu vissutu l'anziani, ma à l'invece,
ci ne vulemu serve pè fà un avvene
più bellu. " U pùblicu hà dighjà pussutu
scopre quattru tìtuli novi à l'occasione di
i cuncerti dati da u gruppu durante u
mese di marzu. Frà 'sse cumpusizione
nove, hè stata prisentata una canzona
scritta da Felice Benedetti in memoria di
Ghjuvan' Battì Acquaviva, A to vindetta.
'Ssi cuncerti, urganizati in autopruduzione,
eranu i primi di a furmazione, è
hanu scuntratu un successu tremendu
tantu in u palazzu di i cungressi d'Aiacciu
u 10, chì nant'à a scena di u teatru di
Furiani u 31, u quale era cumplettu. Successu meritatu
quand'elli si vedenu i sforzi fatti pè l'urganizazione è la
prisentazione.
Si pò dunque parlà di una vera vittoria, micca
solu pè l'Attrachju, ma dinù per a cultura è u
populu corsu, sopr'à tuttu quand'ellu si sente,
dop'à u cuncertu di Furiani, una zitelluccia dì à
a so mamma : " Sai ò Mà, avà ùn sò più francesa…
sò corsa ! ".
Lisandru Giamarchi
