Da a dritta à a manca, erani numarosi in Francia pà dì " innò " à issu trattatu prisintatu
cum'è un passu maiò pà a custituzioni auropea.
Di u " nò " in Francia
55% di l'alittori si sò prununciati pà
ricusallu. Pochi ghjorni dopu tuccava
à l'Ullanda di suità issu risultatu. E' da
quì à pocu sarà u Lussemburgu à
vutà... Di fattu, s'impighjurisci a situazioni
à u puntu chì si senti dighjà
puntà à u parlamentu auropianu
pusizioni pà cacciallu…
Sò parechji i spiegazioni di votu :
Ritinimu à contu nosciu a situazioni
suciali è ecunomica
francesa supratuttu à u niveddu
di u disimpiegu, a frattura
trà un puteri assuffucati di i so
affari di soldi è a ghjenti chì
cunnosci a dura vita di tutti i
ghjorni, è a difficultà di capì
issu trattatu è a so visioni di
l'Auropa. Di fattu hè u guvernu
in piazza chì perdi a so ligitimità
à tal puntu chì u Fronti
Naziunali par esempiu hà
dumandatu a dimissioni di u
prisidenti.
Da l'altra parti, ùn si pò micca
dì in u campu di u " nò "
qual'hè chì ha vintu : Di sicuru
ch'iddi sighini di una certa dritta
o piu maghjuritari a manca,
ugnunu dici a soia. Pà Ulivieru
Besancenot di a Liga
Cumunista Rivoluzionaria, a
vittoria di u " nò " era " u cuntrariu
di a vittoria di a strema dritta. " Pà
Rubertu Hue di u Partitu Cumunistu
Francesi " a Francia hè in una situazioni
di pulitica nova è ci voli chì u
prisidenti ne tinissi contu. " Pà
Ghjuvan Lucca Melenchon si u
prisidenti dici chì ùn ci hè micca pussibilità
di niguzià dinò issu trattatu
allora " ci voli ch'iddu si n'andessi. "
A Francia cunnosci dunqua una
gravissima crisa di cunfidenza cum'è
l'hà pricisatu Filippu De Villiers di u
Muvimentu pà a Francia : " A Francia
cunnosci una crisa pulitica impurtantissima
". Ma pà u Guvernu, è
supratuttu pà u prisidenti, era ubbligatu
di cambià a squadra, di numinà
cum'è Primu ministru Filippu Villepin
è supratuttu cum'è ministru di l'internu
Nicolau Sarkozy.
Di pettu à issa crisa Villepin hà dichjaratu
chì ci vuliani centi ghjorni pà "
renda cunfidenza à i francesi " è di
pricisà dinò chì u sughjettu maiò di u
novu guvernu era l'impiegu.
In Auropa tandu, dopu à u votu
francesi è cù u votu ullandesi, s'intarrugaiani
monda pulitichi cum'è
Ghjuvan Claudiu Juncker prisidenti in
esercitu di l'Unioni Auropiana dicendu
bè chì " l'Auropa ùn faci più sunnià.
" U prisidenti di a cumissioni auropiana
hà ricunniscitu iddu a difficultà di
u prublema pà l'avvena, ma dici bè
chì " ci voli à cuntinuà u travaddu ".
In issa situazioni, numarosi erani i
voci di i populi nigati à chjamà à vutà
pà u " nò ". Da l'Irlanda cù u " SINN
FEIN " à l'Euskal Herria cù " BATASUNA
", sin'à a CORSICA cù u RINNOVU,
L'ACCOLTA NAZIUNALI
CORSA O U PARTITU SUCIALISTU PA
L'INDIPENDENZA. Cum'è numarosi in
Corsica erani quiddi chì ani ricusatu di
andà à vutà, cum'è l'hà ditta CORSICA
NAZIONI INDIPENDENTE pà un
tratattu pà quali nimu di u nosciu populu
hè statu cunsultatu pà travaddalu.
E' in Corsica
In Corsica dinò hè maghjuritariu u
"nò" : 56,83% in Cismonti è 58,6% in
Pumonti. Ma dinò l'astenzioni hè
abbastanza forta : 44,47% in Cismonti
è 43,15% in Pumonti.
Quì dinò s'hè prununciata a
ghjenti pà dì u so ricusu à un
prughjettu ch'impaurisci tutta
una cumunità pà u so avvene.
Ancu si certi partiti francesi
cumu i radicali di a manca
francesa cù in testa u sgiò
Zuccarelli ani chjamatu à u "
nò ", monda naziunalisti è
indipendentisti si ne sò andati
ancu iddi à vutà "nò" parchì in
issu tratattu è senza una pulitica
forti è chjara à u niveddu
auropianu pà a Corsica ùn si
pò cuncipì di adattà un tali
prughjettu à a Corsica d'oghji,
chì ùn hè ricunnisciuta ind'è a
so specifissità. Si ne sò dinò
andati à vutà contr'à u guvernu
francesi in piazza pà muscià
a so opposizioni à ciò chì
si passa ind'è l'isula. Ancu u
prisidenti di l'assemblea tarrituriali
ricunnosci chì ci voli à fà
a pulitica " altramenti "…
Ma pà avali al di là di issu votu chì si
pò aspittà pà a Corsica di issu cambiamentu
di guvernu ? Sempri riprissioni
o un'altra andatura di discussioni
pà metta in ballu un prughjettu
cumunu di soluzioni durabili pà a
Corsica ? L'attentati fatti in pienu ghjornu
à u mumentu stessu di u votu
ramentani al di là di una rivindicazioni
di iss'atti s'idda ci hè, chì quì dinò si
campa di più in più mali, è chì
l'Auropa ùn faci micca sunnià…
Ulivieru Sauli
