Chì paese hè, duve a maior’parte di l’osterie vi pruponenu
tutte e cucine di u mondu for’di quella di u so paese ?
Chì paese hè, duve i cantadori cantanu di più in più canti
francesi, talianu, spagnoli, baschi, brittoni, tradutti in lingua
materna, è chì à u cuntrariu mai, mai, mai una canzona di
stu paese sia tradutta è cantata in issi paesi ? (Hè quessa
l’apertura diceraghju megliu a spalancatura) Chì paese hè,
duve assai abitanti vendenu più vulinteri una casa o una
piana à un furesteru ? Chì paese hè, duve assai abitanti
facenu festa per u 14 di lugliu (festa naziunale francese),
o per u guvernatore genuvese vale à dì l’oppressori, è chì
d’una antra banda si ne impippanu di so gluriosa storia ?
Chì paese hè, duve assai abitanti preferiscenu à parlà a
lingua di u culunizadore, vergugnandusi di parlà a soia ?
Chì paese hè, duve assai abitanti credenu issa lingua
scrianzata è chì ùn ghjova à nunda ? Chì paese hè, duve
assai abitanti (in minorità in casa soia) cuntinueghjanu
à scusassi di a viulenza (tremenda) praticata da i
naziunalisti, liccandu u culu à l’omu scalatu per ch’ellu
si senti bè stallatu megliu chè in casa soia ? Chì paese
hè, duve assai abitanti pensanu esse in un paese poveru
invece chì ‘ssu paese hè statu impuveritu è assuffucatu
da a francia culunialista ? Chì paese hè, duve certi
giurnalisti autopruclamati specialisti di a storia (è di
a cucina) cuntinueghjanu à suminà bugie (à i baulli à
bocca spalancata) minimizandu l’impurtanza di l’epica
independente in u mondu d’eri ? Chì paese hè, duve i
cerbelli culunizati anu fattu più male chè tutte e guerre di i
differenti cunquistadori ? Chì paese hè, duve assai abitanti
volenu manghjà casgiu di qualità è carne bona, ma senza
capre nè pecure, nè vaccine, è senza pastori è senza
terre vindute ch’elle sò per e custruzzioni ?
Chì paese hè,
duve i ladri è i scrucconi ùn vanu mai in prigiò, trattandu i
patriotti di ladri è scrucconi per falli imprigiunà ? Chì paese
hè, duve l’abitanti facenu vultulassi i so antichi in e so
tombe, battuti ch’elli si sò per lasciacci un paradisu, è chì
in quarant’anni l’anu lacatu calcicà fendune un infernu per
u future generazioni ? Chì paese hè, duve assai abitanti
volenu fassi perdunà d’esse originarii di’ssu paese,
fendusi lampà fora (quessa hè una realità, micca un
scrittu nant’à un muru) ? Chì paese hè, duv’ellu ci hè tuttu
per liberassi : una fruntiera impattighjevule, una lingua
(di a sapienza Latinu è Grecu) una piazza predilletta in
u Mediterraniu, una bandera senza paracone à un’antra,
una preistoria unica è una storia di gluriose resistenze ?
L’omi di’ssu paese
Sò chjamati « corsi »
Chì paese serà ?
Antò FILIPPI
