Si dice cusì parlendu di quelli disgraziati chi
cercanu, ad ogni costu, à sorte da i so lochi
per scappà à a fame, à e malatie, à e guerre,
à e persiguizione, è forse truvà in altrò sinnò
l’Eldorado, omancu un paese induve pudè
campà, o mancu campichjà. Pocu fà, quasi à listessu
tempu, emu lettu un racontu, è vistu un filmu, chì,
tramindui, ci fecenu sparte i risichi maiò, i strazzi, è
e poche speranze, chì si devenu aspittà, lampendusi
ver di u scunnisciutu.
U testu di rifarenza ? Quellu di Petru Santu Menozzi,
ind’a rivista ” Bona Nova “, studiatu in classa : di
notte, ind’un battellu pneumaticu migranti ”spandannati”,
incù i so “fangotti strinti”, impauriti da l’omu in
neru, chì reghje u so distinu. U subissu di u viaghju longu
longu è periculosu. I soldi, tutti i so soldi, dati, per avè
una piazza stretta stretta è esse « trattati cum’è cani
». A timpesta, a morte. Salvu, unu solu, da pudè cuntà
a sventura, è sperà in l’ancu à vene…
Ind’u filmu, ghjunghjenu à bon portu, ma mezu morti da
a fame, a seta, u terrore, chì falavanu i colpi di a frusta
: a scusa, u risicu d’affundà. Cose, queste, chì accadanu
aspessu, longu à e coste di l’Africa, ancu di l’Africa di u
Nordu. Senza stinzà troppu, si po parlà, cum’ella face a
stampa, di « la dérive du continent noir ».
Sculunizazione, o culunizazione d’un altru tipu ? Diretta
da l’omu biancu, o in manu à «pellineri » ? A colpa, u
prufilu, l’arrubecciu, per uni pochi, bianchi o neri, grassi
è trugni ; è, per e « masse », u disprezzu, è ancu… u
genucidiu. Populi sfruttati, marturiati ; zitelli-suldati
avezzi à tumbà, furzà ; dittatori ammasgiulati è armati
da l’Europei... Certi paesi sò detti « ricchi ricchi », per
indettu u Nigeria : eppuru, ci deve sopravive a maiò
parte di a ghjente incù menu di 1 dollaru per ghjornu.
Certi usservatori vanu fin’à parlà d’un veru « hold-up »
statale è culuniale.
Deificatu, u petroleu. Ci sò quelli chi l’hanu è ne ponu
ghjucà per impone e so viste, i so intaressi ecunomichi,
è quelli chì u devenu neguzià, da muneta di scambiu,
per fà vene arme o… ingigneri. Si passa cusi trà l’Europa,
i Stati Uniti, a China. In quantu à e suvvenzione, ùn si sà
duv’elle vanu, o piuttostu ùn si dice. A’credeci u «
Nouvel Observateur » (Aprile-Maghju, 2007), eccu ciò
chì s’hè passatu à prò di Kabila (Congo) : « une association
entre seigneurs de la guerre transformés par la
volonté de leurs parrains en pilleurs prédateurs, toutes
nations confondues… « U costu ? Miliarde di dollari, è a
perdita di vite umane, vittime, sia di a guerra, sia di a
ripressione. Ben’intesa, a rialità terribile, a tacenu ancu
i furesteri, chì, a primura, a danu à i so affari, à u guadagnu.
Avarianu bisognu i « neri » d’esse castigati, ancu da a
parte di i soi, divintati putenti. In l’anni 30, ci dicia u
nostru prufissore di filusufia chì noi, « les civilisés »,
aviamu dritti nantu à « les non-civilisés ». Eranu incapacce,
elli, d’avè accessu à a scienza, à l’industria, à a
nazione. Parechji eranu sempre antrupofaghi. Si trattava
di « mentalité primitive », d’età mintale zittellescu,
di messa in tutela, è basta ! Ferma sempre u disprezzu.
Fughjenu amiseria, a morte forse, i boat-peopel di i nostri
tempi. U seculu discesette fù quellu di migrazione
maiò nate da a situazione pulitica di l’Inghilterra, tandu.
Hè cusì ch’elli sbarconu, prima i Calvinisti fughjiti in
Olanda per pudè tene a so fede, è dopu 20 anni, in 1640,
« Cavaliers » fidi à u rè Charles I, chì fù sintiziatu à
morte : tutti, ind’a so diversità, à l’origine di i Stati
Uniti. Avia da nasce un omu novu l’Americanu : u so
mottu, « Life, Liberty, and the pursuit of happiness ».
Ma, scurdendusi di i so guai, i culoni, per u più, di
l’Indiani chì eranu sopra locu, è ch’elli vulianu stirpà, un
vulianu sente puzza. Per fà la finita, tutti i mezi funu
messi in ballu da i cusidetti “civilisatori” : da l’ingannu
à e fucilate, è l’aiutu di u rumu. Ma i neri ? Pare chì i
primi à esse traspurtati culà ghjunsenu ind’u 1619 in
Virginia. A dopu a rivuluzione americana, ùn era più a
schjavitù prufittevule ind’u Nordu ; ind’u Sudu, si pinsava
ch’ell’avia da sparì. Ma l’invenzione di « the cotton
gin », chì permettia di spiccà u cutone rozu (“King
Cotton”),dede un slanciu novu à a schjavitù, cancellata
solu ind’u 1861. A discriminazione, a segregazione eranu
sempre in ballu quandu schjattò a siconda guerra mundiale.
U prublema, avà in prima linea, quellu di l’Africa.
Innumerevule e vittime di i genucidii, prima in Rwanda,
avà in Sudanu o in Darfour, o in altrò... Ci hè da spirà chi
a cumpassione, u rispettu, pigliaranu u disopra nantu à
« u soldu », l’indiffarenza, u disprezzu. Ùn si pò più fà
crede cum’elli faciani i Spagnoli, dopu a scuperta di
l’America, chì i nativi di quelli paesi luntani, sò privi
d’anime, o chì i so cadaveri ùn sò micca sottumessi à u
prucessu di a putrefazione.
Anghjulamaria Carbuccia
