U 9 d’ottobre di u 1967, muria
Ernesto Che Guevara, à l’età di
39 anni, in a machja di Bulivia...
A so vita fù corta ma ricca cum’è quella di l’eroi.
In tempu di ghjuventù, st’Argentinu era medicu
è avia giratu l’America latina sana pè guarì è
purtà aiutu è sustegnu à tutti i populi povari di
un cuntinente, chì campava sott’à a duminazione pulitica
è ecunomica di i Stati Uniti. Per ste persone inghjuliate,
diritti ci n’eranu pochi è micca. Una vita fatta di strazii è di
penseri in aspettendu a morte. Ghjè quì, accant’à elle, chì
Guevara hà fattu attu di cuscenza pulitica è suciale è ch’ellu
hà principiatu a so furmazione di militente sucialistu è
internaziunalistu ind’è u cuntestu di « guerra » trà l’America
è a Russia. Marssistu, credia ind’è l’ideale cumunistu :
quellu chì avia un veru sensu umanu è chì purtava u scopu
di a liberazione di l’omu, quellu revoluzionariu è micca
dugmaticu è ortudossu di u PCUS. Ci vulià cambià u mondu
è torce l’inghjustizie, avendu sempre à mente sti principii.
È a startegia revuluzionaria l’hà purtatu in Cuba, à fiancu à
Fidel Castro ind’è La Sierra Maestra da u mese di dicembre
di u 1956 à quellu di ghjennaghju di u 1959, è dopu a vittoria
cont’à a Battista è a so sperianza à u guvernu, hà fattu a
scelta difficiule d’andassine pè purtà a fiama di a resistenza
è di a revoluzione ind’è d’altri paesi. Una manera di vulè
mette in pratica u so discorsu è a so azzione, di fà suffià u
ventu di a storia è di u cambiamentu.
40 anni dopu chì ci ferma di ellu ? Pudimu dì, senza
sbagliassi, chì a so lotta ùn hè compia è chì ci ferma
sempre u so spiritu ribellu. U so visu cuntinueghja à purtà
e sperenze di tutti quellu chì lottanu per un mondu novu
è sfarente, da u Paese Bascu à a Corsica passendu pè
u Chiapas, a Palestina ò l’Armenia. E purteremu, fin’à a
vittoria, u so messagiu pè una vita ghjusta, senza miseria,
induve ognunu pò travaglià per campà è micca per esse
servu d’un altru. Un mondu d’omi liberi, in ogni locu è nant’à
e so terre : liberi di fà, di custruì è di parlà e so lingue. Liberi
è indipendenti di e putenze culuniale ò imperialiste. Un
mondu, una Corsica, da fà, è da stampà nant’à u librone di
a storia. Per un avvene di benistà, di vita è di pace, induve i
nostri figlioli seranu, cum’ellu dicia Castro in u 1967, cum’è
Che. Fora di i clanisimi è di i banditisimi. In Corsica cum’è
in altrò.
BATTI LUCCIARDI
