Corsica Nazioni Indipendenti avia urganizatu una cunsulta cù l’insembu di i sezzioni.
Monda militenti so cuddati pà fà u puntu nant’à a situazioni.
Ben sicuru, pà via di un testu
prupostu da a sezzioni suttanaccia,
i dibattiti si sò purtati
nant’à a l’unioni (Unioni Naziunali),
l’unità strategica (a pruposta di un
fronti d’urganisazioni), è i rilazioni di
u nosciu partitu cù l’insembu di u
muvimentu patrioticu.
Si ugnunu ricunnosci l’impurtanza
di l’unioni, i critichi si sò purtati
nant’à a u pesu di iss’unioni nant’à u
tarrenu di i lotta, è i necissari adattazioni
pà pisà di più.
Ognunu hà dinò ricunnusciutu l’impurtanza
di circà in senu à u muvimentu
naziunali i cunvergenzi pà
metta in ballu un’unioni più forti.
Un’analisi hè stata fatta da a
Cunsulta naziunali.
Corsica Nazioni
Indipendenti
A piazza di Corsica Nazioni
Indipendenti hè stata dinò l’uccasioni
di dibattiti. I militenti rammentani
cù ghjustezza chì ogni urganisazioni
devi esista cù u so parè è chì Corsica
Nazioni Indipendenti devi cuntinuà
a so custruzzioni di
prughjetta di sucità pà una
Corsica Indipendenti è fà senta
dinò a so voci quandu a situazioni
li dumanda.
I Ghjurnati
Ben sicuru ùn si pudia micca fà
una riunioni d’istati senza parlà di
i ghjurnati. Quist’annu i ghjurnati
devini essa dinò l’uccasioni di
muscià publicamenti a forza di u
muvimentu patrioticu nant’à a
scena intarnaziunali rivindichendu
forti è tutt’insembu a difesa di a tarra
corsa oghji missa à mali da a pulitica
di spussessu ingaghjata da u guvernu
francesu cù a cumplicità di certi eletti.
Un tema saria dinò cunsacratu à
l’intarnaziunali pà muscià chì l’indipendentisti
in lotta contr’à u culunialisimu
devini accunciassi pà fà senta
a so voci supratuttu à l’iniziu di i
prossimi alizzioni prisidenziali francesi.
A tarra
A difesa di a tarra hè stata unu di i
temi forti di discussioni. I pruposti sò
stati parechji muscendu bè a cuscenza
di i militenti di fronti à issu spussessu
culletivu. Di fatti uni pochi di
pruposti ani à essa analizati da a
prossima ghjunta pà metta in ballu
iniziativi nicissarii pà muscià chì a
noscia tarra, nimu ùn la pò cumprà,
ùn vale à pattighjà !!!
U suciali
S’hè dinò parlatu di sughjetti di u
suciali. Un testu hè statu prupostu à
a riflessioni di l’insembu di i militenti
pà arradicà u nosciu partitu ind’è a
lotta di quiddi chì in Corsica, è sò di
più in più numarosi, ani un debuli
niveddu di vita, o micca stentapani è
casi pà campà…
A riunioni s’hè compia cu l’esposizioni
sempri d’attualità di a situazioni
di i patriotti incarcerati è u sustegnu
di tarrenu chì se devi purtà à issu
niveddu.
Ulivieru Sauli
