Movenu e cose ind’è u
mondu sanu. Troppu prestu
ind’è i paesi « sviluppati
» ; pianu pianu ind’è l’altri.
Ma, luttà, ci vole sempre à
luttà… s’ella hè pussibile,
micca solu per e donne,
micca sempre contr’à l’omi
chì, omi è donne, semu
aspessu uniti ind’è a sorte
cumuna.
In sti tempi di grilli, è di
nustalgia, volta a mente in
daretu. Ci rammintemu
Aleria, ben intesa. Eramu
sicuri tandu chì e cose mai
più ùn sarianu cum’è
prima. Più minore, ma
sempre in listessu spiritu
militante, in listessa esigenza
di ghjustizia, a mossa «
Donni corsi » in Aiacciu.
Rammintemu i fatti. Semu
di ferraghju di l’anni 80.
Pessima a situazione pulitica.
Eppuru, a maiò parte di
a ghjente, o si n’impippa, o
ùn a sà. U scandalu, ci vole
à fallu cunnosce : in poche
parolle, 8 à 15 anni di prighiò
per i nostri, libertà per
l’autori di 47 attentati. Ci
semu stallate in carrughju,
davanti à a Prifettura, incù
un scrittoghju spiicativu. U
nostru mottu : « Libertà per
i patriotti ». E’ ci semu state
di notte è di ghjornu. Certi
ùn a pudianu crede (sarà
pussible ? u leitmotiv…).
In quantu à « a ghjente »
quelli chì eranu ind’è u bus
s’intarrugavanu eppò si
sminticavanu prestu. I caffè
eranu in sussuru, è ci facianu
purtà da beie è da
manghjà. Più strana l’invita
fatta da un omu attimpatu,
di spiritu cristianu, chì ci
vulia allughjà, dicendu «
Povare donne, sole sulette,
vinite in casa meia, chì a
piazza ci hè per voi tutte… »
Ci hè stata dinò l’occupazione
di F.R.3. per leghje u
nutiziale. Cacciate da pulizzisti
« bon enfant », ci
semu fattu trascinà senza
ch’ellu sia trasgraditu u
galateu. Si lagnavu u capu
di a squadra, dicendu :
« Aiò, zitelle, chì m’ete da
fà vene a scruchjetta ! »
Tempi è tempi… Di corta
durata, a nostra mossa. Ma
aviamu purtatu a nostra
petra à l’edifiziu. 20 anni
dopu, hè amare u custatu,
ùn sarebbe cà ind’è u
campu di a nostra identità.
Certe donne cuntinueghjenu
à luttà aiutendu l’incarcerati
è e so famiglie, pruvendu
à salvà u circondu.
Ma l’affare sò per u più in
francese... E’, disgraziatamente,
sò state ancu e
donne, e nostre mamme, in
prima linea, ind’è u prucessu
murtiferu. Ossesse da u
stantu, forse ancu da a prumuzione
suciale, per i
figlioli, e scunvinte da l’invite
ufficiale, anu cutribuitu
à a perdita tamanta di a
nostra lingua. A’ u « parlà
francese ! » di a mamma,
avia da risponde, omancu à
credeci l’affissi di l’anni di
brusta, u « O ma, parlami
corsu ! » di a zitella.
Parlà, leghje, scrive, a so
lingua, ùn sarà nurmale ?
O vulemu firmà illiterati di
a nostra cultura ? Saria ora
d’avvedesi ch’elli ùn bastanu
micca qualchì intitulati
in corsu, quandu l’articuli o
i cumintarii sò i francese…
Salutemu quì a dimarchja
di l’insignanti, omi è
donne, à l’origine di « A
mossa pà a lingua ». (cf
Arritti, 13-04-06). Lighjimu :
« A lingua corsa ùn pò essa
custretta à u duminiu di
l’educazione… Ci vole à
sparghje u so usu in a
sucietà sana sana… A lingua
corsa hè l’affare di
tutti. « Ùn dice altru
Ghjacumu Thiers (A nazione,
Maghju 2006), avà
Presidente di u cumitatu
scientificu di u cunsigliu di
a lingua è a cultura Corsa.
Persuasu, cum’è noi, ch’ellu
« ùn ci vole à tricà di più
» per « assucià tutti i settori
di a sucietà (urganisimi,
intraprese, istituzione è servizii
in a dinamizazione di
a lingua ».
Omi è donne di stu paese,
ci sò sempre, per dà un
slanciu à a so vita ecunumica
(ne tistimuneghja a
rivista « Paesi »). Ma, sminticà
u sintimu d’appartene à
una tarra, à una culitività, à
una storia, ma perde a so
lingua è esse incapace di
trasmettela, vole dì sparì da
populu, è ancu d’individuu
impastatu da i detti, usi, è
fatti di l’antenati.
Ma, postu chì noi Corsi
semu d’estru pueticu, è, à
l’amore trà omi e donne, à
l’amore maternu è paternu,
à l’amore patria, ci vulemu
sempre crede, citaremu,
per cunclude nantu à un
tremulu di spiranza, a chjama
ch’ellu lampava Patru
Santu Leca, ind’u 1925, à
l’innamurati siinzenndula
appena per fanne un missaghju
di fratillanza à noi
tutti : « E tramindui, in
piena luce/ Ricchi di fede è
di spiranze ghjà mature/
Uniti pigliaremu a strade
chì cunduce/ Versu li jorni
calmi e le gioie sicure… »
Anghjulamaria
Carbuccia
