À l'invitu di Corsica
Nazione Indipendente,
Ghjuventù Indipendentista urganizava
in cumpagnie di e
delegazione di giovanni
prisenti in Corti, un
dibattitu nantu à a
piazza di a ghjuventù
ind'è Lotte di
Liberazione Naziunale,
in u mentre di e
Ghjurnate
Internaziunale.
Fù l'uccazione una
volta di più di cunfruntà
e situazione
pulitiche, pruvendu
attempu di rinfurzà e sulidarità dighjà stabbilite.
Dopu à una piccula prisintazione di a GI
è di a situazione nostra, fù lacata a parolla à
i nostri invitati è messi à palesu i punti di
cunvergenza.
Situazione varie è lotte cumune
Eranu dunque prisenti ingiru à i militenti di Ghjuventù
Indipendentista, i raprisintenti di e mosse di giovanni
indipendentisti baschi, catalani è sardi.
Malgradu e situazione geupulitiche qualchì volta più chè
varie, è aldilà di a lighjittima rivindicazione di u dirittu
à l'autoderminazione per i nostri populi, sò state messe
in risaltu prublematiche cumune è ughjinche, fruttu di u
prucessu di glubbalizazione chì ci tocca à tutti.
À nome di JERC (Jovent d'Esquerra Republicana de
Catalunya), Arnau Albert i Generò, dopu ad avè prisintate
a so urganizazione, è frà altru a so raprisintazione
tantu in Madrid (1 elettu) cà u Parlamentu catalanu (2
elettu annantu e liste d'Esquerra Republicana), hà sottulineatu
a sfida di a so mossa di pettu à a prublematica di
l'alloghju. Difatti, è u fenomenu sbocca pianu pianu in
Corsica, crescenu i prezzi di e case è di e pighjò senza
chì e paghe cunniscessinu a stessa andatura.
Giovanni Marco Ruggiu è Simone Maulu, per a Sardigna
vicina sò turnati nantu à manumessa d'un associu pubblicu/
privatu in quantu à l'acqua : prublematica chè
n'avemu avutu l'uccazione di dinuncià ind'è noi è di cumbatte
di manera diretta, intravendu l'intrata di u capila
di Kyrnolia, impresa lucale di a multinaziunale Veolia, in
u Cunsigliu d'Amministrazione di l'Università di Corsica,
fendu eleghje Gérard Romiti, patrone piscadore, chì currisponde
bella di più à u sviluppu chè no bramemu per a
Nazione Corsa.
L'IRS (Indipendentzia Repùbrica de Sardigna) hà datu l'assaltu
à quella manumessa, mittendu in ballu un'urganisimu
cuncurrente chjamatu Abbalibera (Acqua Libara), di
pettu à quella righjunale Abbanoa (Acqua Nova). A gistione
di l'energie rinnuvabbile sò dinù state dinunciate.
Stu dibbattitu fù dinù l'uccazione per Ruben Ribero, à
nome di SEGI, è incù a graziosa traduzzione da l'Euskara
à u francese di Aritz Ortuno, di vultà nantu à a ripressione
di pettu à a manca abertzale è SEGI illegalizatu è
casticatu da l'indegni tribbunali spagnoli.
L'alloghju è a spiculazione immubbiliaria sò dinù prublematiche
chì toccanu Euskal Herria, è SEGI s'hè impignatu
assai di frontu à què per via d'azzione simboliche è varie
di pettu à l'agenzie è e risidenze sicundarie. U publicu
curtinese hà infine pussutu piglià cunniscenza di a pruposta
pulitica di u muvimentu abertzale per l'Autunumia
d'Ipparalde (Paese Bascu di u Supranu). Sta pruposta purtata
in u so tempu da Ipparetarak s'hè vista attualizata à
e rialtà ughjinche.
Sulidarità internaziunale : una dichjarazione à vene
Di farraghju, in u mentre di a terza edizione di i Scontri
Internaziunali urganizati da Ghjuventù Indipendentista,
era statu attuatu da e delegazione prisente u principiu di
lotta cumuna è di sulidarità di e ghjuventù di e Nazione
senza Statu.
Une pochi di punti eranu stati accunsintiti da e delegazione
prisente : drittu à l'autodeterminazione, lotta di
pettu à a riprissione pulitica, è l'agressione fatte à e nostre
tarre, o ancu a messa in sesta d'un' aducazione pupulare
di qualità rispittuosa di e nostre idintità.
E leie rinnuvate in cor'd'annata, è in particulare in Santa
Maria is de Àcuas, per a Festa Manna, appuntamentu
annuale d'Indipendentzia Repubrica de Sardigna, induve
Ghjuventù Indipendentista cum'è JERC eranu prisenti, è
una pruposta di dichjarazione di e Nazione senza Stati
firmata. Quella sarà prisintata da pocu à u Parlamentu
Aurupeu da diputati catalani è scuzzesi per chere l'impegnu
di l'UE à livellu di e nostre quistione naziunale.
Ste Ghjurnate Internaziunale di u 2007 avaranu messu à
palesu quistione d'impurtanza (acqua, energie,
alloghju…) chì ghjuvaranu ad apprufundisce a pruposta di
dichjarazione di sulidarità di a ghjuventù in lotta attata
à l'ultimi Scontri.
Quella sarà firmata ingiru à e delegazione mintuvate chì
a prisintaranu in i s'appuntamenti pulitichi rispittivi : da
i Scontri à a Festa Manna, da u Paese Bascu à l'Acampada
Jove di Saint Celoni.
E nostre vicinanze pulitiche, culturale, storiche, certe
volte geugrafiche sò una forza per ghjunghje à u nostru
scopu cumunu, l'Indipendenza Naziunale, in u reciprocu
rispettu di i nostri mezi di lotta. Cusì, suvitaremu incù
intaressu a pruposta di legge chì sarà sposta à u
Parlamentu catalanu da u giovannu diputatu di JERC Pere
Aragonès( 24 anni) è chì cuncirnarà e difficultà per i giovanni
ad allughjassi per Catalunya…
P-A Tomasi
