D’una banda, l’estate cusì
dettu « indianu », l’estate
chì ùn vole more… Da
l’altra banda, e « goth-goth girls »,
chì parenu d’esse in dolu.
Ùn ci pudemu sbaglià : u neru
piglia a suprana ind’è e butteghe è
pocu à pocu invade ancu u carrughju.
Nere e botte, neri i vestiti,
neri ancu i tenipetti è i calzunetti.
L’inguernu sarà « gothic », vale à
dì un « remake » di l’anni 80 è
ancu di l’epica beata, à a fine di u
seculu diciottu, di u macabru, u
sopranaturale, i murtulaghji, i
campusanti, e ruvine, a natura
salvatica. A “goth-goth girl” si
deve di vestesi da degna erede,
micca da quelli chì anu alzatu i
bellissimi domi di stilu goticu
ind’è u medievu mancu à pinsacci
– ma forse da scenografi,
chì, cum’è Hitchcock, anu
riesciutu à dacci u “frisson”
aspittatu. Oghje ghjornu, si
tratta per u più d’un mendu,
d’un « Gifoutout », mischjendu,
per uni pochi di literati i
scritti di Mary Shelley
(« Frankenstein »), o di
Walpole (1764 : “The castle of
Otranto, a gothic story”), per a
maiò parte di i ghjovani
attrazzi zitelleschi ch’elli credenu
d’esse una sfida à u sucietà,
cum’è u cusì dettu “heavy
metal” (anelli sprupusitati, sunagliuli
di pestiferi, ecc...).
In leia sempre incù a moda, è assai
più anzianu cà u “gothic look”, ma
chì l’accumpagna d’incantu : a
marchja fatale ver di a taglia
“zeru”... E fantasime invadenu ancu
u sacrusantu “podium” di i stilisti
più rinumati. Ci hè vulsutu ch’ella
morse da a fame, à 22 anni, Luisel
Ramos per ch’ella punessi u prublema
a stampa, di l’anuressia
inghjennata ind’è i « mudelli »
(certe volte à 16 anni…)da i dittati
di « a moda » ! Anuressia,
magrezza à cantarettu, irregularità è
ancu perdita di e « regule »,
ricorsu à l’allopiu per « tene »,
ecc… Da l’altra banda, timica riazzione
in Spagna, è offensiva di i
« faux-culs » in isse Francie… è ci
n’hè ancu per l’omi.
A lei incù a morte a facenu, à
modu soiu, i tercani di a « haute
couture », impunendu un’estetica
murbida à mudelli schenetrichi
senza puru sceglie di vesteli in neru,
chì un dolu ùn hà nunda à chì fà
ind’è u rituale di i « beautiful people
». Un passu in daretu, u femu
noi oghje trattendu di l’impurtanza
ch’ellu t’avia u neru ind’è a nostra
cultura, spechju d’una storia tribbulata
assai. Purtemu forse, senza
sapella, u dolu di un rituale, chì , a
morte, ùn a piattava micca da affare
vargugnosa, o fastidiu, è basta ! A
morte, dice Philippe Sollers
(Nouvel Obs.) ùn hè micca « tendance
», è, saria questa « la raison
pour laquelle la morbidité, la violence,
et la dépression s’exaspèrent,
boostées par le divertissement
publicitaire. « Sia cum’ella sia, a
perdita ind’è noi hè tamanta.
Spariti, l’usi funerarii (u caracolu, u
rimbeccu, u voceru…), ancu s’ellu
ferma sempre in paese l’aiutu à a
famiglia indulurita (cunfortu,
manghjaria, prisenza). U malatu,
per u più hè mandatu à u spidale, è
e parte si facenu tandu ind’è a
stanza murtuaria.
Avariamu, noi Corsi, u cultu di a
Morte… Ma cumu sminticà à
Falcina, u so visu, u spaventu, l’addiu,
l’addisperu ? Pò parlà Katty
Andreani-Peraldi di i « visages
de la Mort » in parechji :
ferma sempre a morte di l’essare
amatu, u scandalu maiò,
ancu s’ella deve esse a morte «
l’événement le plus prévisible
de notre vie »… U scandalu
veru, a morte viulente di u giovanu,
mandatu à fassi tumbà da
a putenza statale, o, peghju
ancu, sintinziatu à morte da i
soi. A Corsica saria “l’île-tombeau”
? Ùn a vulemu crede, in
dispettu di e tragedie, e vindette,
e rivalità murtifere, e dillusione.
I nostri i guai, quelli
patuti da l’altri populi : viulenze,
bugie, curruzzione,
matirialisimu, disoccupazione ;
i ricchi sempre più ricchi, i
povari sempre più povari ; Ma,
per noi, a disgrazia maiò :
quella d’ùn pudè più dissi Corsi, in
lingua corsa ! Invichjati, o spariti, o
incarcerati, l’eroi di e nostre lotte.
Ma firmarà per sempre, à mezu à
d’altri, l’esempiu di Natale Luciani,
patriottu, pueta, rinvivitu pocu fà da
a televisiò, spechju di e nostre speranze,
di e nostre dillusione, ma
vivu per u sempre. A dicia Ziu
Santu à u zitellu Andria (ind’è u
libru di Rinatu Coti, « Una spasimata
»), è a vulemu crede :
« L’omu veru, chì faci da omu, ùn
more mai ! »
Anghjulamaria Carbuccia
