Saranu dighjà finite e cuccagne di l'istatina
? Sarà ghjuntu u tempu di a nustalgia ?
Sia cum'ella sia, l'auturnu hè, sopratuttu
per i più anziani, intintu di malincunia,
forse di meditazione "metafisica", diciaremu.
Un rituale sittembrinu s'impone à noi
tutti, Corsi di fede o micca, per avellu vissutu,
o omancu vistu, incù a so parte
d'ombre, e so origine luntane è ascose, u
so significatu fondu.
Si tratta di una prucissione, chì a so singularità
hè di movesi sicondu a sesta di a
spirale. Rammintemu ch'ella hè a granitula
una cunchiglia marina, volesi dì, senza
troppu stinzà, un simbulu di vita, incù e
so circunvuluzione, spechju di u ciclu di a
Natura. Lighjimu à G.G. Franchi (Forme è
primure di a puesia d'oghje) : "S'intorchja
cum'è à ingolle unu à unu i participanti, si cunghjunghje
quì cù quellu di a scirata murtulaghja pà infigurà u parcorsu
d'ogni vita umana". È scrive torna P. Antoni (in
l'Ultimu paciaghju) : "A cunfratera di Sant'Antone, è fidi in
fila, avanzenu in cerculu, chì ghjiore strignendusi. Ghjuntu
ind'è u centru, u capu di a fila ritorna è torna in l'altru
sensu. È cusì a prucissione s'isbuscineghja è s'imbuscineghja
à listessu tempu." Tuttu què ind'è u spaziu cunsacratu,
in giru à a croce. Arburu di vita è "axis mundi", è
prutettu da a prisenza di a Vergine è u Bambinu.
Menu difficiule, ma simbulicu anch'ellu, u parcorsu ind'è
u labirintu, un parcorsu iniziaticu, longu à una struttura
difinita, un rituale di gruppu, o individuale, sempre
magicu à principiu, aspessu ludicu oghje ghjornu. Hè
statu u labirintu u tema di l'emissione Arte, u 20 d'aostu.
Semu stati propiu smaravigliati da u misteru di e seste
antiche, da a billezza di i labirinti, detti "paisisti" di i nostri
tempi. U labirintu ne parla Erodotu (484 - 420 nanzu à
Cristu) à l'epica ch'ellu fù custruitu l'edifiziu munimentale
di Fayoum, in Egitta. Si cunnosce megliu u labirintu di
Creta, chì, 3000 o 4000 anni in da, fù u teatru di i malfatti
di u Minotauru è di e prove di Teseu, aiutatu da l'amore è
u filu d'Ariana. Una storia cumuvente assai, è rammintata
(in 79 nanzu à Cristu) da un zitellu in Pompei chì, prima
di sparì in l'eruzzione di u Vesuviu, scrisse trè parolle
nantu à un muru : "Hic habitat Minotaurus". Graffitti
storichi questi.
Ùn si laca micca sminticà a deambulazione di a Granitula.
Ma mancu si lacanu sminticà u passa è vene è a corsugrafia
longu à u labirintu, in ghjesgia è for di ghjesgia. U labirintu,
o piuttostu i labirinti, cusì diversi è spaversi : l'itinerariu,
u marcanu e petre o l'erburina o i sepali. Sicondu u
locu, l'età, e primure di a ghjente. Giranu i participanti
cum'ellu gira u mondu, da a so vulintà è u dittatu di u rituale.
Facenu a leia incù a tarra, a "Tellus Mater". Stupenda a
sumiglianza trà u disegnu di l'una è di l'altru è quellu, sia
di l'impronte di i ditti, u curdone bilicale è i visceri animali
è umani : sempre a spirale, mutivu predilettu di i Celti, per
indettu.
U chjerchju, u girà, a regula ind'è u sistema planetariu, è
per forza, u distinu di l'individu. A sanu è a dicenu i pueti.
Revenimu à Dumenic'antone Geronimi, ind'è u so puema
"Rigiru" a primura di cumintà è d'allargà u dibattitu, senza
fà rifarenza à un Diu, mittendu l'incalcu
solu nantu à a currispudenza, ùn
sarebbe cà trà l'annellu è u sangue, è
a vita intima di a Natura, una Natura
tonda, chì ciò chì hè dirittu vene d'altrò.
In quantu à l'omu, per ùn abbacinà
in lu giramondu pesa u palu di u spiritu,
trapana l'Universu, è prova ad
assicurà lu sicondu u so naturale.
Megliu, ùn si pò fà è dì. Libertà o
schiavitù ? Si pò capì ch'ellu provi un
altru pueta (Ghjacumu Thier) ciò
ch'ellu chjameria forse Petru Mari "un
gridettu di rivolta", sclamendusi (in
innu) : "Ch'ella pianti a granitula"...
Anghjulamaria Carbuccia
