Un pocu di storia…
In a lingua danesa si scrivi e si dici
« gronland » e voli dì « tarra verda
». In lingua « kalaallisut » si dici «
kalaallit nunaat ». Hè a pocu
pressu à u Xisimu seculu chi l'isula
cuperta a 84 % di ghjiaccia hè scuperta
da i vicchingui. Certi dicini
chi prima, l'isula hé stata abitata
durant'a tre milla anni da populi di
l'artichi. So l'inuiti chi si stallani
nant'à u tarritoriu a u principiu di u
XIIesimu seculu, alora ch'iddi partini
i vicchingui dui seculi dopu a a
so venuta e chi si fermani sin'e a
oghji. L'inuiti so di fatti i cummunità
di u Gruenlendu.
…e d'attualità
Ghjé u regnu di u Danimarca chi
rivindichighja u drittu nant'a issu
tarritoriu. I so primi spidizzioni
ricoddani a u XVIIIisimu seculu. I
Danesi ani circatu da tandu a cunverta
l'inuiti e metta in piazza stabilimenti
di culunii cummirciali. Di
fatti fora di certi mumenti l'isula hè
firmata uott'a duminazzioni
danesa. In 1953 u statutu di l'isula
passa di culunia a quiddu di cunteu
d'altri mari. In 1979 hè missa in
ballu l'autonomia interna. In 1985,
l'abitanti dicidani di spicassi di a
Cummunità Ecunomica
Auropiania. In 1982 vutani in
maghjorità pa' ricusà l'intrata di
l'isula ind'é L'auropa : u so paré di
l'epica era di micca a essa custrettu
ind'é i so attività écunomica comu
a pesca da i dirittivi auropiani.
E oghji ?
U 25 di nuvembri di quist'annu,
l'abitanti di u Gruenlendu dumandani
cu un votu maghjoritariu un
autonomia piu forti di pettu à u
Danimarca. I novi puteri pa' l'istituzzioni
di l'isula so i tribunali e a
pulizia. C'é dino a splutazzioni di i
risorzi e richezzi naturali cume u
pitroliu, l'oru, u diamanti, u
piombu, u sincu e u gasu. C'é
supratuttu a ristituzzioni di a lingua
di u paesi chi hé una lingua
inuita di a dimensioni ufficiali.
Una tapa di suvranità pa' l'indipendenza
?
Pà issu paesi chi conta 57 000 abitanti
fra quali 50 000 inuiti, issu
passu novu versu più autonomia pò
essa cunsideratu com' una tapa
vers'a l'indipendenza. L'anzianu
rispunsevuli di u guvernu, Lars-
Emil Johansen ha dichjaratu dopu a
u votu chi « ghjé u piaceri di ritruvà
a so fierezza, di rialzà u capu dopu
a tant'inghjustizia di u passatu, chi
l'inuiti ani vutati in forza. Ié ben
sicuru puddemu e surteci, ié u puddemu.
Ghj'é un'aspirazzioni lighjitimà,
parchi a vulintà d'indipendenza
he arradicata bé ind'é
l'anima inuita. » Pa' issu anzianu
rispunsevuli, issa pussibilità po
essa missu in ballu ind'é un avvene
micca troppu alluntanatu.
Ind'é a custruzzioni auropiana,
l'evoluzzioni di issu tarritoriu devi
essa suitata bé : A mezzu a i Stati
Uniti e l'Auropa, in pusizzioni strategica,
a situazzioni di suvranità
evolutiva pudderia essa un asempiu
di stabilità rispunsevuli e di
dimustrazzioni identitaria
muderna.
Ulivieru Sauli
