A prublematica di e rumenzule hè una quistione pulitica
d’impurtanza in a sucetà di u cunsumu chì ghjè a nostra.
L’esempiu stremu di u fiascu di u puliticu nantu à stu sughjettu
hè quellu di a cità di Napuli induve u mulizzu empie
strette è traverse hè induve c’hè vulsutu à chjamà l’armata
da risolve a crisa. Al dilà di ste fiure chè n’avemu tutti in
mente spunta u bisognu d’una scelta chjara in quantu à u
so trattamentu. A dicia u cummissariu aurupeu incaricatu
di l’ambiu « a messa in causa di a rispunsabbulità di u crimine
urganizatu ùn pò piattà a causa a più diretta, da sapè
l’assenza di vulintà pulitica ».
In Corsica u Syvadec a so scelta
l’avia fatta, era quella di l’incinneritore.
Intantu chì in Francia
criscia a mossa contru à sta suluzione,
l’Assemblea di Corsica
decidò imponeci unu. In u 2002
vutava u so PIEDMA (Pianu
Interdipartimentale d’Eliminazione
di e Rumenzule), à l’unanimità di e
furmazioni pulitiche dette « tradiziunale
», Corsica Nazione solu
s’era uppostu à stu prughjettu.
L’avvene li darà a raghjone.
A nicissità d’una gistione rispunsevule
di e pulitiche publiche
I risichi di st’unità di trattamentu
sò cunnisciuti, a crescita di i casi
di cancari in i rughjoni d’incineritori
sò una rialtà. U prufissore
Belpomme, spizialistu di a quistione
era ancu ghjuntu in Bastia
da tene una cunfarenza nantu à
stu tema. L’intaressi finanziarii sò
dinù stati messi à palesu per via di
l’uppusizione à u prughjettu spripusitatu
di u novu portu di Bastia
o di a gara di transittu di
l’Arinella, dipoi abbandunata.
Ma quandu si sà chì suluzione
alternative esistenu, vale à dì a
metanizazione, u cumpustaghju, u
riqualificamentu, in fin’di contu a
riduzzione di u mulizzu à a fonte,
ghjè l’incapacità di a classa pulitica
corsa chì risorghje. Incapacità
ad anticipà e prublematiche, irrespunsabbilità
di pettu à a salute di a
ghjente ! U cullittivu l’hà dinunciatu
è ferma mubbilizatu dipoi
l’annunziu di l’abbandonu di u
prughjettu d’incinneritore in u
Ponte à a Leccia, cuntinuveghja a
so infurmazione à a pupulazione
(tinia una riunione di sinsibbilizazione
à u riqualificamentu u 6 di
ghjugnu) è dumanda sempre a revisione
di u PIEDMA. Si pudaria
pinsà chì stu casu era sintumaticu
di u casticu puliticu corsu :
manc’appena, l’incineritore torna,
sta volta quì in Sardegna !
U Nò francu di l’indipendentisti di l’iRS !
In fatti d’offese à l’ambiu a
Sardegna hà dighjà patutu : ùn
parlemu mancu d’una apprupriazione
di u liturale da ricconi,
gran’gruppi o ancu particulari (ùn
avete cà pinsà a a Villa Certosa di
Berlusconi), ammintatevi sta basa
nuclearia di a Maddalena è di a
pulluzione di tutte l’astre !
Li volenu avà stallà un’incineritore
in a Pruvincia di Nugoro, per u
paese d’Ottana più pricisamente.
Ben’intesu i risichi sò i listessi chì
per quellu ricusatu da a mubbilizazione
pupulare in u Ponte à a
Leccia, è e suluzione alternative
ch’esistenu, dinù…
L’indipendentisti d’iRS ne sò cuscenti
è anu sceltu di manera rispunsevule
di dì innò di modu
francu à stu scumpientu. A so
uppusizione o quantu lighjittima è
dinù quella di a raghjone
quand’omu sà chì a legge taliana
accorda « certificati verdi » à l’industrie
chì pruducenu energie da
rinnuvà è chì l’incineritori sò qualificati
di tal’manera !
Tandu li prighemu curaghju è forza
in a so mossa per dì à u Statu
talianu chì sè ind’è elli a « sardigna
» hè u locu induve si cunfinanu
i baschiccii d’animali è e
rumenzule, per u Mare Tarraniu hè
a casa di u populu sardu chì vole
piglià in manu u so distinu è campà
libaru nantu à a so tarra.
A fine di l’incineritore corsu !
Per via di a so decizione di l’11 di
lugliu, l’Assemblea di Corsica hà
vutatu l’abbandonu di u prughjettu
dopu à mesi è mesi di mubbilizazione
di u Cullittivu contru à l’incineritore.
A prossima tappa sarà
revisione definitiva, in quantu à
què, di u PIEDMA.
P.A Tomasi
