"Sò dunqua diventati muti l'armi di Oglaigh Na Heireann (nomu gaelicu di l'Armata
Ripublicana Irlandesa)"
Ind'è l'ultimu numaru di u
nosciu ghjurnali, spiigavamu
l'impurtanza di u gestu di l'urganisazioni
armata irlandesa di
risistenza. Era discrittu cumu un
passu novu ind'è l'avvena d'issa
lotta chì riposa anch'idda nant'à u
drittu di i populi à ammaistrà u so
avvena.
Sò dunqua diventati muti l'armi
di Oglaigh Na Heireann (nomu
gaelicu di l'Armata Ripublicana
Irlandesa) è l'annunciu hè statu
salutatu ind'è u mondu intrevu. Da
toni Blair sin'à Ghjorghju Bush.
Emu ripruduttu più inghjò issu
cumunicatu. Hè da leghja pà capì
meddu a diminsioni di u missaghju
cappiatu, sapendu chì fora di issu
passu maiò pà a paci, è malgradu
l'attitudini di l'unionisti chì necani
d'una manera o d'un 'altra l'andatura
di l'I.R.A., avvena sanu ùn si
puddia custruiscia in Irlanda.
Issu cumunicatu pricisighja bè
chì si compia a lotta armata u 28
di luddu à parta da 16 ori, dendu
l'ordini à tutti l'unità di l'armata di
risistenza di renda l'armi, è dunqua
di parmetta pà via d'altri
mezzi pacifichi di cuntribuisci à u
sviluppu di prugrammi pulitichi è
demucratichi. Hè
pricisatu dinò chì i
cumbattenti ùn
devini avè altri
attività. Issa pricisioni
hè stata data
à un mumentu
induva si circaia
sempri à criminalizà
u muvimentu
patrioticu irlandesu.
Hè dunqua
una pricisioni di
pesu chì voli dì chì
i vulintarii ùn
pudarani essa chè
militenti pulitichi.
Issu gestu hè
dinò spiegatu
cumu un sustegnu
schiettu di l'urganisazioni
di risistenza
à a strategia
di paci di u " Sinn
Féin ", sapendu
ancu chì a parti
maiori di u populu
sustinia iss'andatura.
Issa strategia,
malgradu i difficultà,
devi parmetta à
tempu di metta in
ballu u prugrammu di l'Irlanda
unita. È si oghji altri
cundizioni sò isciuti
chì parmittini di fà
crescia l'ubbietivi
ripublicani è dimucratichi,
u cumunicatu
dici bè chì
avali i cumbattenti
di l'I.R.A. sò sempri
cunviti di a lighjitimità
di a lotta armata.
U scopu di l'armata
irlandesa hè ben sicuru mantinutu
: l'unità è l'indipendenza di
l'irlanda. È oghji cambiani i mezi.
Hè lampata una chjama à tutti i
ripublicani pà fà un sforzu massimu
è pà l'unità.
Issu cumunicatu metti in rilievu u
sensu storicu di tutti l'oglaigh (suldati
di l'I.R.A.) è oghji fighjulemu
incù monda attinzioni a situazioni
di issu populu chì cunnosci avali
un adatura di paci pà campà
dumani in tarra soia, libaru è
unitu.
Ulivieru Sauli
