S'aspittaia dapoi un bellu pezzu, dapoi l'anni 1998, mumenti storichi di l'accordi di paci di u
vennari santu, à u disarmamentu ufficiali dopu à a treva di l'urganisazioni militaria di risistenza
ripublicana. Hè dunqua oghji resa publica issa pusizioni chì scrivi un'altru mumentu
impurtantissimu di a lotta di u populu irlandesu pà a so autoditirminazioni.
"Tutti l'unità di l'IRA ani avutu
l'ordini di sbarazzassi di l'armi è
tutti i so vuluntari devini vighjà à
u sviluppu di prugrammi sultanti
pulitichi è dimucratichi incù mezi
esclusivamenti pulitichi ". Eccu
dunqua in termini chjari u spiritu
di a cumunicazioni storica di l'armata
irlandesa di risistenza à
l'uccupanti britanichi. Hè di sicuru
un ghjestu impurtantissimu
chì dimustra a missa in ballu
d'un altru niveddu di lotta dopu
à l'aquisti pulitichi uttinuti da u
muvimentu ripublicanu.
Di sicuru ind'è u mondu intrevu
iss'annunciu hè statu accoltu
benissimu. Toni Blair, Primu
ministru inglesu hà dittu chì "
ghjè un passu di dimensioni mai
vistu ind'è a storia attuali di
l'Irlanda di u Nordu ". È di pricisà
dinò chì " a paci rimpiazza a
guerra è a pulitica u tarrurisimu
annant'à l'isula d'Irlanda ".
U porta voci di u prisidenti
americanu, Ghjorghju Bush,
Scott Mc Clellan hà dittu chì "
issa dichjarazioni hè impurtantissima
è putenzialmenti storica ".
Si sà chì l'americani ani aiutatu
monda l'andatura di paci in
Irlanda.
Voci simili si sò intesi da Madrid
à Brusselu passendu pà Pariggi.
Di fattu ùn c'era chì u prutistanti
Ian Paisley pà dì " chì ùn era satisfatu
è ch'iddu aspittaia l'IRA à i
so atti ".
Parlaia cusì à l'epica Eoin O Broin
rispunsevuli di u " Sinn Fein " ind'è
un intarvista datu à " Arritti " (n°1882)
dimustrendu bè u so rolu più chì
maiori ind'è l'andatura di paci.
Aghjustaia dinò à l'epica chì " u successu
di l'IRA era di mantena a
cuizioni ind'è i mumenti i più difficiuli,
particurlamenti quandu l'unionisti
è u guvernu britanicu ani strascinatu i
peda, o di fronti à i paramilitari ligalisti
".
Si ramenta omu chì pochi mesi fà, a
prupaganda di u sistemu inglesu circaia
dinò à criminalizà pà via di certi
affari l'insembu di u muvimentu
ripublicanu ma l'ultimi alizzioni ligislativi
in Inghilterra (u Ribombu
internaziunale numaru 3) ani cunsacrati
a vittoria di u " Sinn Fein "
chì hà ottinutu cinqui diputati pà a
camara di i cumuni.
L'IRA hè in treva dapoi parecchji
anni. Sin'à l'ufficialisazioni di u so
disarmamentu, sò più de centi tonni
d'armamenti chì sò stati distrutti sott'à
u sguardu di a cumissioni intarnaziunali
cumandati da u ginirali
canadiani De Castelain. Iss'ultimu
hà cunfirmatu pocu tempu fà chì
l'IRA avia ripresu cuntattu pà cuntinuà
à distrughja l'armi. È dapoi u 1997, è dopu à l'accordu di u vennari
santu, mai l'IRA ùn hà impiegatu
l'armi malgradu certi mumenti
durissimi cum'è issa campagna
midiatica di criminalisazioni di u
muvimentu ripublicanu è i pruvucazioni
di certi gruppi unionisti
ch'iddi, ani cuntinuati à assassinà
ghjenti, ancu trà d'iddi…
È allora chì Gerry Adams si filiciteghja
di a pusizioni di a principali
forza di risistenza armata irlandesa
dumandendu à " tutti i naziunalisti è
ripublicani irlandesi ancu quiddi chì
ani manifestatu u so ingaghjamentu
cum'è vuluntari ind'è l'IRA di metta u
so talentu è a so anargia ind'è a custruzioni
di una nova Irlanda ", di l'altru
cantu l'unionisti ricusani sempri
issu gestu cum'è l'accordi di paci di u
vennari santu... Dapoi qualchì sittimana,
a Forza di i Vuluntari d'Ulster
(UVF) hè accusata di principià torna i
so attività di viulenza à tal puntu chì u
guvernatori britannicu Peter Hain hà
accusatu issa furmazioni di diventà "
un nemicu di a paci ". È parla dinò di
ruttura di treva.
Si i ripublicani ani musciati u so
sensu di i rispunsabilità, è supratuttu
l'IRA chì scrivi pà via di u so gestu
una nova pagina di a storia di u muvimentu
irlandesu, a situazioni ferma
sempri di cunflittu. L'attivisimu di certi
gruppi unionisti, è u so ricusu di l'accordi
di paci metti in rilievu chì si
monda cundizioni di drami sò daretu,
fermani sempri cundizioni pà impedì
a paci d'arradicassi. È cuntinueghja
dunqua cù d'altri mezi a lotta di u
populu irlandesu.
Ulivieru Sauli
