"Pochi voci si sentini quandu ci voli à parlà di u prublema di u Kurdistan, paesu nigatu ind'è
u so esse da u Statu turcu"
À u mumentu induva monda furmazioni
pulitichi si ponini a quistioni
di a pussibilità di fà intrà a Turchia in
Auropa, è chì l'attuali stituzioni aurupiana
dumandani à issu paesu
d'aduprà certi cuncetti ditti dimucratichi,
cum'è u rispettu di i dritti di
l'omi, pochi voci si sentini quandu ci
voli à parlà di u prublema di u
Kurdistan, paesu nigatu ind'è u so
esse da u Statu turcu, è ùn hè micca u
solu.
A ruttura di a treva da a guerilla kurdistana
pochi ghjorni fà ramenta à
l'upinioni intarnaziunali è più specificamenti
aurupianu a rialtà di un populu
sempri nigatu trà quattri stati
custituiti frà quiddi a Turchia…
U 13 d'uttrovi setti " commando "
turchi sò stati tumbi è setti altri ferti da
l'azzioni di "H.P.G." (Hezen Parastina
Gel - Forza di difensa di u populu)
ind'è a pruvincia di Hakkari, cioè u
Kurdistan supranacciu suttu a duminazioni
turca.
Iss'azzioni pochi cunnisciuti da i
media intarnaziunali - pò dassi
fatt'apposta pà un taccà micca l'imagini
di a Turchia - mosciani a rialtà di
una situazioni difficiuli, hè vera, (u
Kurdistan hè da u puntu di vista tarrituriali
spiccati da quatri stati custituiti)
ma chì dumanda pà stabilisci u
rughjonu (u tarritoriu iracchianu hè
monda vicinu) una vera suluzioni
pulitica.
Si sà, supratuttu pà via di l'invasioni
Americana di l'Iraccu, chì a Turchia
avia paura di a pussibilità pà i muvimenti
kurdi in Iraccu di prufità d'issa
situazioni pà metta in ballu un
andatura di suvranità. Si sà oghji chì i
kurdi participighjani à l'attuali guvernu
iracchianu.
Di fatti, a Turchia s'impaurisci di i
pussibilità di suvranità chì nascini quì
o culà è chì, in u tempu risichighjani
di rimetta in causa l'attuali fruntieri chì
un rispettanu issu populu kurdu. A
storia di issu populu hè fatta di lotta
insanguinata trà urganisazioni kurdi…
Ind'è un intarvista, u
prisidenti di u cunsigliu
esicutivu di u
Cunfidiralisimu
Dimucraticu di u
Kurdistan (KKK) datu l'11
d'uttrovi pricisighja bè u
cunflittu cum'è iddu si
poni avali. Dici bè chì "
duranti tutti i scontri
intarnaziunali è ind'è i
niguziazioni cù i forzi di
u Kurdistan di u suttanacciu,
u guvernu hà fattu
tuttu pà impidiscia a
noscia presa in contu.
Allora chì sustinimu un
missaghju di paci, i so
sforzi diplumatichi circani
à impidiscia issu missaghju.
Ùn si pò micca dì
chì quissi sò boni intenzioni
". U rispunsevuli
puliticu dici dinò nant'à a
quistioni di l'Auropa è a
Turchia chì u so muvimentu
hè " favurevuli à l'intrata di a
Turchia ind'è l'unioni aurupiana ma
nant'à u fattu chì ci sighi una
suluzzioni pà a quistioni kurda. Ùn si
pò micca cuncipiscia chì a Turchia
duventa dimucratica senza dà una
soluzzioni pulitica à a quistioni kurda
". È di dì dinò chì " l'Unioni aurupiana
hè monda aspittata pà dà u so parè
francu è chjaru nant'à u Kurdistanu ".
Di fatti oghji hé mantinutu u cunflittu
malgradu a sorti aurupiana chì si
disegna pà a Turchia. Malgradu i trevi
di l'urganisazioni armati kurdistani
l'armata turca hà cuntinuatu i so
malfatti fendu morti è ferti ind'è i
muvimenti patriotichi kurdi. Si ripidda
dunqua à l'armi è s'aspetta ind'è u
dibatittu intarnaziunali attuali quali
sarà u pesu aurupianu pà metta in
ballu un andatura di suluzioni pulitica
pà u Kurdistan.
Ulivieru Sauli
