Sti pochi tempi parechje
zone di pulluzione sò state
lucalizate vicinu à e coste
corse. A cappiera d’idrocarburi
da i battelli chì
navicheghjanu per ste
loche n’hè a causa.
L’offesa à a Corsica
Hè stata una di e nutizie di st’istate
: hè statu trovu u petroliu in quantità
à u largu di u nostru liturale.
Piccatu ùn hè ancu sottu mare, ma
nuta di sopra… Sò pochi i rughjoni
à firmà à l’infora di sta pulluzione o
d’un risicu maiò. A costa uccidintale
hè stata tocca cù l’Argintella
vicinu à Galeria o puru Ghjirulatu.
Quella urientale hà dinù cunnisciutu
stu fattu da u latu di a
Sulinzara. Ghjè un ecusistema sanu
chì hè cusì dannighjatu o in periculu
d’esselu tandu chì st’arie sò à
spessu spazii prutetti. Puru s’elli sò
parechji anni avale ch’elle s’alzanu
e voci da dinunzià sti risichi, a prublematica
di a difesa di l’ambiu
corsu ferma posta. Issa statina,
l’Uffiziu di l’Ambiu è u Parcu
Naturale Rigiunale di a Corsica anu
postu una lagnanza contru à X dopu
à a scuperta di e tracce di petroliu
per Galeria, Greenpeace hà fattu
cunnosce u 31 di lugliu scorsu a so
uppusizione à u trafficu di e nave
chì trasportanu carghisgione priculose
in e bocche di Bunifaziu.
Eppuru l’auturità ùn si movenu…
A criazione di zone d’alta surviglianza
Di pettu à a mubbilizazione di i
difensori di l’ambiu è di a tarra sò
state pigliate diverse misure di prutezzione.
Ammintaremu a criazione
di a Riserva Naturale di
Scandula in u 75 è a so classificazione
à u Patrimoniu Mundiale di
l’UNESCO in 83. In l’anni novanta,
fù un passu maiò a messa in sesta
di u Parcu Marinu di e Bocche di
Bunifaziu è u Protocoliu di 1993
trà a Francia è l’Italia da pruibisce
u trafficu di e nave di sti paesi chì
trasportanu carghisgione priculose.
Eppuru si custatta ch’abbisogna
d’andà aldilà è chì stu guadru prutettore
ùn basta più. Hè cusì chì per
certi a salvezza di ste loche pudaria
passà per a messa in ballu d’una
PSSA (in inglese, Zona Maritima
Particularmente Dannighjevule) :
l’Uffiziu di l’Ambiu di a Corsica
n’hà da fà a dumanda davanti à
l’Assemblea di Corsica per
Scandula, i guverni taliani è francesi
ne duvarianu fà cusì tantu
davanti à l’UMI (Urganizazione
Marittima Intarnaziunale).
A rispunsabbilità di u Statu francese
Sò anni è anni ch’omu sà chì una
catastrofa petruliera per u
Meditarraniu saria una strage trimende
in stu mare chjosu. Omu hè
dinù cuscente di u caratteru priculosu
assai di certi lochi cum’è e
Bocche di Bunifaziu chì i naufragii
ci sò stati numarosi : in 1994 u
sprufondu di u Fenès carcu à oru
ne fù u primu avertimentu. Eppuru
u Statu francese ricusa di trattà u
prublema in avanzu : ste PSSA
pruposte da l’Uffiziu di l’Ambiu
duvarianu dighjà esse in ballu è
pare naturale ch’ellu sia ghjà intarvinutu
da dumandà l’interdizzione
di tutti i battelli periculosi per e
Bocche. Invece rinvia a s’azzione à
andature luntane : sò avale dece
anni chì si tratta d’un Parcu Marinu
corsosardu, Greepeace hà dumandatu
à Jean-Louis Borloo d’attivà
torna u prughjettu in u guadru di
l’Unione di Meditarraniu, vene à dì
da quì à torna dece anni… Eppò,
preferisce rilativizà ogni dannu
ridiculizendusi à l’uccazione. U
blog A Piazzetta ritraccia l’evuluzione
di u trattamentu di a pulluzione
di l’Argentella da a Prifittura
Marittima. Nutizia di pulluzione in
a ghjurnata di u 4 d’Agostu, infurmazione
di l’AFP nighendu ogni
risicu, ricusu di mette in opara u
pianu Polmar u 5, è interdizzione
di bagnassi in u rughjone u 6 ! Si
trattava di « nappe d’idrocarburi
senza gravità» sicondu à quessi.
Sicuramente ch’in fatti di pulluzione
marittima, tale u nulu di
Cernobile, u periculu si ne stà à
l’infora di l’acque tarrituriale…
Petru Antone Tomasi
http://www.wmaker.net/apiazzetta/Pulluzione-al-
Argentella,-bugia-o-sumerisimu-di-a-Prefettura-
_a359.html
