Pochi tempi fà, pa via di una cunfaranza stampa, a sezzioni
suttaninca di Corsica Nazioni Indipendenti pidaia pusizioni
nantu u cartulari di u P.L.U. di Purtivecchju.
I so purtavoci dichjarani allora chi ssu pianu porta un’altra
logica di svillupu ecunomicu chi un pidda in contu l’intaressi
culletivi di u rughjonu, di i portivichjiacci, e ch’iddu annunzia
cio chi sarà a u niveddu di u nosciu tarritoriu isulanu, a pulitica
di u P.A.D.D.U.C. : Vali a dì comu dicia à l’epica u facistu
Benito Mussolini : “ La gabbia senza gli uccelli ! ”. Un pudemu
accittà ssa logica di nigazioni chi indebulisci i valori culturali
e suciali di u nosciu populu. Un pudemu accittà un’ecunumia
chi s’appoghja nant’u spussessu di a tarra e pa’ l’intaressi
privati di gruppi finanziari stranieri. Un pudemu accittà chi da
qui a pocu un saremu piu indé noi !
L’indipendentisti di a sezzioni ani urganizzatu dipoi parechji
mesi un travaddu di riflessioni e d’accolta nant’a ssu sughjettu.
E si sentini dipoi quaalchi settimani i voci chi ricusani ssu
pianu. Oghji si parla ancu di mossa, in carrughju. I sittimani
chi venini hani da muscià comu s’ani da urganizzà tutti quiddi
chi dicini innò a ssu P.L.U. Ghjughjini prestu i municipali
francesi : Forse, al di là di i sfarenzi di l’unu o di l’altru ci po
essa un’intesa cumuna a u primu giru – i naziunalisti chi no
semu qui travaddemu pa’ quiqqa dapoi mesi è mesi – ma
nimu un po circà à piattà chi ciò chi si passa in Portivecchju,
si passa dino in altro in Corsica e chi rivindicà un’altru avvena
pà ssa cumuna un si po cuncipi senza un paré simili a u
niveddu di a Corsica.
Saremu dunqua prisenti a ssi municipali cu un duppiu
missaghju : quiddu di sviluppà Portivecchju pà via di un
sviluppu ecunomicu durevuli e cumplimentari indé i so settori,
e quiddu di rivindicà pà a noscia isula un principiu di suluzioni
pulitica.
U spussessu un si faci micca sulamenti in Portivecchju…
ULIVIERU SAULI
