D’una banda, si fistighjeghje u
Natale è Capu d’Annu, a
ghjente dendusi più o menu à
u mendu dittatu da u cunsumerisimu.
Da l’altra banda, sempre più numarosi i
dannati di a tarra à pate u fretu, a fame,
e guerre… Intantu, si ne more a pianta,
avvilinata, marturiata, sprizzate. Ùn
saria ora di pinsà « glubalamente »,
ma d’agisce senza più tricà « lucalmente
» ?
E’ turnemu à Vignale ! Ié, turnemu à
Vignale, chì questa a verità detta è detta
torna dipoi anni è anni, pare ch’elle sia
stata detta in darnu. Eramu uni pochi à
esse cuscenti di u periculu, ma passavamu
da lunatichi da allarmisti, è, in
ogni casu da seghe. Ascultacci, mancu
à pinsacci Eppuru, limitenduci à a
Corsica, pudiamu dì, anni fà, ch’ellu
era bellu longu u listinu di l’offese, di e
bugie, patute da ella, in nome di u cusì
dettu « prugressu » !
Rammintemu torna u scandalu in giru
à Cernobile, sempre d’attualità. Stalvò
u 26 d’Aprile di u 1986. Tocchi è sintiziati
à morte quelli chì campicciavanu
vicinu à a « cintrale » atomica, stantenduci
u so pane à mala via, senza esse à
capu di u risicu d’irradiazone, senza
mancu dispone di mezi, ancu incerti, di
pruteggesi. In quantu à noi Corsi pinsavamu
ch’ellu era bellu luntanu
Cernobile. Tuccava à i nostri tercani à
micca spavintà a so ghjente, à tace u
più pussibile u periculu. Prima tappa,
dunque, a non infurmazione ; siconda
tappa, a disinfurmazione. Ùn era ancu
sparta a terribile nutizia u 3 di maghju.
E’quandu ùn s’hè più pussutu tacela,
tandu n’emu intesu di tutte e mamme :
risicu zeru – a Corsica prutetta da un
ciclonu pruvidenziale, eccetera… Ancu
più stupente e cacciate di u tippu : «
vous pouvez boire de l’eau contenant
du plutonium, manger des légumes gorgés
de plutonium… », o, « le plutonium
simplement aussi toxique que la
nicotine, et seulement une dizaine de
fois plus que la caféine… » Parenu
fole !
Intantu, possu accertà chì, omancu in
Sardegna (ci eramu da studienti), tinia a
gattiva nutizia a prima piazza ind’è a
stampa, tale un sicondu Hiroshima…
Era interdettu di manghjà « verdura »,
di beie latte frescu ; i
zitelli, ci vulia à teneli
in casa, ecc. Dibattiti
accaniti è infurmati
avianu a so bella
piazza à a televisione
taliana, è ebbenu certi
medici u curagiu, per
indettu in Verona, di
dì, per via d’affissi,
chì « nessuno puo
prevedere quali
saranno i danni alla
salute per i prossimi
anni… la scienza
medica non è oggi in
grado di proteggere la popolazione da
quei danni… L’unico modo di prevenire
il rischio nucleare è non costruire
nuove centrali è chiudere quelle esistenti…
»
Dibattiti falsi o trapassati, à crede
certi : noi dimu piuttostu dibattiti
accantati… u pinseru maiò essendu u
soldu, è a scusa dì « l’umanitariu ». U
« star system », trapassa a scena, u
filmu, invade u campu di u « sport », di
a pulitica (cf « les présidentielles »), di
l’eculugia. Difficiule tandu di dispiace
à l’istituzione, à e firme, à i rituali di
regula à mezu à « the happy few »,
chjamati avà « people »… Tutti o quasi
tutti riprisentanu assoccii caritative, per
fassi perdunà i so guadagni propiu
sprupusitati. A scusa di certi difenditori
di a Natura : fà pagà quelli chì l’imbruttanu
o, più cuncisa, a furmula in francese
: « pollueurs égal payeurs ».
Sempre listessa rifarenza à i soldi, sempre
u cultu di Mammone, sempre a
prustituzione generalizata, è sempre
l’ingannu maiò. Sò ancu capaci certi
spittatori d’adimette ch’elli guadagnessini
l’animatori fin’à 300 000 euro u
mese. A televisione, è avà l’ordinatore,
l’allopiu maestru à prò di uni pochi.
Bastarà a limosina di i ricconi per fà
sminticà i so malfatti ? È chì hè di a
nostra a ricchezza, l’aria falcona di e
nostre muntagne, e purezza di i nostri
fiumi, di u nostru mare, di u nostru
cibu ? Pocu à pocu è ancu in furia, si
n’impatruniscenu furesteri pridaghji,
incù a cumplicità di certi puliticanti
corsi. A Corsica, disgraziatamente, ùn
scappa nè à u scempiu, nè à l’igannu
chì u copre. U veru, ci vole à circallu,
micca ind’è i raporti ufficiali, ma ind’è
e riviste di spiritu naziunalistu o eculugistu.
Lighjimu : le scandale du
Syvadec (Syndicat régional pour la
mise en oeuvre du traitement des
déchets en Corse) – l’amiante : exposition
largement supérieure aux taux
autorisés – l’incinération, la pire des
solutions : tout est transformé en produits
hautement toxiques… è, per cunclude
u custatu affanosu : « U Vazziu
pè i Pumuntichi, u tigliu pè i
Cismuntinchi ».
Tuttu què ci riporta 20 anni in qua,
incù a riprisentazione di « U ruminzulaghju
», è a scrizzione nera nera di ciò
chi si priparava, o era dighjà in ballu ;
ascultemu à Artimisia, a vechja strega :
« A’mé mi agusta u muntese ruminzulosu…
E’l’adore di i lochi impuzzichiti.
Hè bellu cà smaritu u tempu
Di a tramuntana fresca è sana…
L’aghju, eiu, a primura
S’elli inturbidiscenu i fiumi !
Ghjornu par ghjornu l’acqua ùn mi
arreca
Ad usciu è à casa,
I rigali di u mondu sanu :
Buttiglie di plastacu scritte
Cù e sette matre lingue,
Pastetta ch’elle annirisca a pelle…
Altru cà u sole !
Spizietta da sculurisce i capelli,
Stupponi misinchi,
Pulvaretta da fà pulizia,
me d’ogni manera...
A’chi un hè cuntente ch’ellu zerpi ! »
Anghjulamaria Carbuccia
