L'elezzione di u candidatu dimucratu
Barack Obama à capu di
i Stati Uniti d'America custituisce
un evenimentu maiò. E manifestazioni
pupulare è l'intaressu
sprimatu in lu mondu sanu traducenu
stu fattu puliticu
ch'avarà avutu un ribombu
internaziunale. Messu in avanti
finu à l'ultimu minutu da i l'usservatorii,
e so urgine ùn l'avaranu
manc'appena impeditu di
triunfà. Ma l'appossu di u
mondu finanziariu ramenta
quellu passu di u famosu
rumanzu di Lampedusa. Sè
Wall Street si ne diventa u
Tancredi di u ghjattupardu
Obama, tandu a so vittoria ùn
trapassarà u statu di l'anedotta
storica…
A negazione di e minurità :
un trupisimu francese
Pare chì a vittoria d'un omu neru à
l'elezzioni americane abbii surpresu
à tutt'ognonu, particularmente in
Francia. Hè vera chì ind'un paese
chì hà cunnisciutu a segregazione
raziale, è induve si manifestanu
gruppi chjaramente razzisti è supremazisti,
a prova d'Obama ùn era
vinta à l'avanzu. Eppuru u pesu puliticu
d'un Colin Powell o d'una
Condoleezza Rice per ùn trattà chè
di sti pochi anni, hà avutu un'influenza
maiò nantu à e scelte di
l'amministrazione Bush. Ùn si ne pò
dì astr'è tantu in Francia induve e
minurità, ch'elle sianu immigrate o
storiche, sò propiu nigate. A cumunità
internaziunale incalca spessu
nantu à stu fattu. A negazione di l'alterità
hè un andatura bella più arradicata
ind'è a mentalità francese
ancu s'ella si manifesta di modu
menu viulente ch'in America. Tandu,
s'ellu hè rilativizatu ancu l'aspettu
raziale di l'elezzione d'Obama, chì
firmarà di a sperenza di e brame di
cambiamentu è di prugressu messi
in risalti durante a campagna. Iè
l'anu fatta ad eleghjelu ma per scambià
chè ?
U.S.A : l'impussibule tarramottu
puliticu…
Sti millai d'omi è di donne in carrughju
chì parianu riprisentà una
giovanna nazione ricunciliata cun
ella stessa pudarianu cuncretizà
una rimessa in causa prufonda
d'un sistema malatu. A situazione
ecunomica è suciale di u paese a
nicissiteghja. Eppuru, pariamu di
più assiste à un muvimentu di gioia
spuntanea, forse passaticciu, ch'hà
un muvimentu puliticu di fondu.
Eccuci sempre ind'è u sognu di
Luther King chì si spinghjarà cù u
ritornu à a rialtà ? Difatti, u tarramottu
puliticu per 'ss'America pare impussibule.
Colpa à u sistema puliticu chì
impedisce a sprissione d'ogni tindenza
d'idea à l'infora di i dui partiti
« uffiziali » chì trovanu un accunsentu
nantu à a maiò parte di i tema,
in particulare in quantu à l'ecunumia
è u suciale. Stu sistema cunsidera u
liberalisimu stremu cum'è sustanziale
à u mitu fundadoriu di i Stati Uniti
d'America. Ogni nuzione di ripartizione
più ghjusta di e risorse hè cunsidarata
cum'è eresia. Ùn dicia Mac
Cain in u mentre di a campagna chì «
piglià i soldi d'Americani per dalli ad
astri Americani ùn era manc'appena
l'America » ? Eppuru si multiplicheghja
u numaru di worker poor,
cresce a miseria è a frattura suciale
diventa un abissu. In quantu à a crisa
ùn si tratta manca di muralizà u capitalisimu
cum'ellu a dice Sarkozy, ma
di salvallu : Obama quant'è Mac
Cain sustinianu u Pianu Paulson per
vene in aiutu à e banche tocche da a
crisa finanziaria. Di pettu à què
l'eternu Ralph Nader, candidatu per a
quinta volta a s'hè pruvata di purtà
un'alternativa à u sistema : ritiru
subitu di e truppe in Iraccu, calata di
u bugettu di a difesa naziunale, rispettu
di a cunvenzione di Kyoto, o
tassazione di a spiculazione finanziaria.
Interdettu di dibattitu publicu,
pocu è micca mediatizata, a so candidatura
chì purtava ella l'iniziu di
d'un cambiamentu forte, ùn hà
ricolta chà 0.5 %. Obama ellu fù
sustinutu da a sfera finanziaria, u
ghjrnale The Economist allegatu di
Wall Street hà chjaramentu chjamatu
à vutà per ellu. Colin Powell,
anzianu allegatu di Bush dinù…
Yes they will Can…
Pierre-Antoine Tomasi
