Charles Orlanducci, vera legenda di u ballò in Corsica, si ne torna à u Sporting per aiutà u
club. L’anzianu capitanu di u SECB ci spiega u so novu rollu è ci dà u so parè annant’à a
situazione ughjinca.
U Ribombu : Dipoi qualchì settimana,
si sente parlà di u vostru
ritornu à u Sporting. Sarà vera ?
Charles Orlanducci : iè, ghjè vera !
Ancu sè, à u Sporting, ci sò sempre
statu. Sopratuttu st’ultimi anni. Era
più vicinu di u club. Rendia serviziu
per un affare o l’altru, per andà à
vede a ghjente... Ma quist’annu, sò
un pocu dumandatu da tutte e parte
è pensu chì mi devu di rende stu
serviziu. Aghju 54 anni, è sè u
Sporting hà bisognu di mè, sò dispunivule.
I servizi chè possu rende
sò nant’à u rilaziunale, e
rilazione di u presidente
incù i ghjucadori... à u livellu
mediaticu. A mo missione
sarà quessa ma dinù à u livellu
spurtivu, possu dà un
colpu d’ochju à ciò ch’ellu
si face, ciò chè ùn ci vole
micca à fà, possu purtà u
mo sapè, a sperienza di
tutta a mo carriera. Possu dà
u mo parè annant’à tuttu.
U Rib. : Dunque, sarebbe
un postu di direttore
spurtivu finalmente ?
C. O. : Nò, micca specialmente.
Ognunu e so rispunsabilità.
U mo rollu ùn hè chè
spurtivu. Ùn possu micca occupammi
d’affari chè ùn socu fà ! Parlatemi di
sport, u restu ùn m’interessa micca.
Cunnoscu a ghjente incù a quale
aghju da travaglià, socu chè u club
hè purtatu bè. Mi ne sò resu contu
dipoi chè u Sporting hè cullatu. U
club hè diventatu di più in più
prufessiunale. È ghjè impurtante !
Nanzu era un pocu n’importa cumu...
Più và, è più mi rendu contu chì ghjè
una grossa intrapresa. Ci vole à purtalla
di manera seria.
U Rib. : À u livellu di l’arrulamentu
di ghjucadori, avarete qualchì funzione,
darete u vostru parè ?
C. O. : Iè. Daratu u mo puntu di vistu
annant’à tuttu, tuttu ciò chì cuncerna u
sport, l’arrulamentu... l’elementi chì
saranu cuntattati, faraghju pruposte di
ghjente chè possu cuntattà.
U Rib. : Dipoi qualchì annu, ci hè
di menu in menu ghjucadori corsi à
u Sporting, à parte quist’annu induv’elli
sò ghjunti Camadini è Lorenzi. Chì
ne pinsate ?
C. O. : Hè un pocu cumplicatu l’affare
di i ghjucadori corsi. Ci hè parechje
ragiò. U centru di furmazione ùn gira
micca cum’ellu avarebbe à girà, à u livellu
di a furmazione lucale. Per
cumincià, tocca à l’educadori, quelli
chì sceglienu i giovani, di sceglie i
boni. Ci vole à sceglie i migliori per
dalli una bona furmazione. Osinò ùn
pò micca andà. Ghjè cusì chè ci vole
à fà. Hè dura a selezione ! Ind’è u
centru di furmazione, ùn ci vole
micca à cuntentassi di u lucale, ci
vole à piglià i boni, ancu in altrò. I
lucali, ci vole à avelli, i boni ci vole à
piglialli d’uffiziu. Ma se avemu un
ghjucadore lucale mizanu, è un altru
vinutu da fora chì tene a strada, ùn
pudemu esità.
U Rib. : È si face avà di piglià i più
forti in Corsica ?
C. O. : Si cumincià à fà. Si cumincià à
esse di più in più attenti à stu livellu.
U Rib. : Qualchì annu fà, ùn era
micca u casu !
C. O. : Nò, ùn era micca u casu. I giovani,
u Sporting ùn si ne occupava
micca. Eranu un pocu spapersi.
Avà, ci vole à avè i
migliori quì o ancu à l’ACA,
hè listessu affare. Ci vole
ch’elli sianu ind’è i club corsi
prufessiunali.
U Rib. : Per ciò chì tocca
à l’arrulamentu, uni pochi
di ghjucadori corsi ghjocanu
oghje à u livellu
prufessiunale, cum’è per
esempiu Yohan Cavalli.
Pinsate ch’ellu ci sarà una
vulintà di u Sporting di
andà à circalli ?
C. O. : E cose ùn sò micca
cusì semplice, per custruisce
una squadra, ùn basta à dì ùn vulemu
chè corsi ! Sicuramente ch’ella mi piacerebbe
una squadra cumposta unicamente
di ghjucadori corsi. Ma ci vole à
custruisce una squadra per cullà in prima
liga. Forze chè Yohan Cavalli ùn entre
micca ind’è u sistema di ghjocu di l’intrenore.
Cavalli hè un ghjucadore chì s’hè
fattu solu è forze un ghjornu vulterà à
ghjucà in Corsica. S’ellu si ne volta un
ghjornu, sarebbe bè, per andà versu una
squadra di più in più lucale. Sarebbe u
più bellu di fà una squadra chè di Corsi !
Ma prima, ci vole à mantene a squadra à
u livellu è fà entre pianu pianu i Corsi.
U Rib. : Dunque, site statu cuntattatu
da i dirigenti, ma sò ghjente
chì anu da ripiglià u club, o i dirigenti
attuali ?
C. O. : Sò dirigenti attuali eppò dinù
quelli chì anu da entre. Aghju parlatu
incù tutti, cumpresu Vendasi, postu ch’ellu
si parlu d’ellu. M’hà dettu ch’ellu
pudia esse presidente d’onore per
riprisentà u Sporting, ma ch’ellu ùn pudia
micca esse presidente attivu. Hà troppu
travagliu è ùn hà micca u tempu. Hè cuntentu
ch’eiu sia ind’è sta squadra custì.
M’hà dettu “ci vidimu è pruvemu à dà un
aiutu à u club”. U Sporting face parte di a
nostra storia, di a nostra vita d’ogni ghjornu...
U Rib. : Dipoi dui anni, ci hè una
rompitura impurtante trà una
parte maiò di i supporter è i dirigenti.
Cumu pinsate di pudè un
ghjornu cambià e cose ?
C. O. : L’affare di i supporter ùn hè
d’oghje, hè un pezzu ch’ella dura. Ùn
ci ne surtimu micca di stu cunflittu.
Aghju l’impressione chè ghè un affare
di persona. Ùn sò micca esattamente
ciò chì s’hè passatu... Pensu chì sti supporter
volenu bè à u club. Ma ùn capiscu
micca bè sta situazione. L’affare di u
scrittu “stumacati”, pensu ch’ellu era
priparatu.
U Rib. : Sè u Sporting avissi vintu,
nimu saria falatu nant’à u terrenu !
C. O. : Iè, hè sicura. Se avissimu ghjucatu
cum’ellu si deve... à un mese di a
fine, ùn c’era nimu chì pudia dì chì u
Sporting ùn saria micca cullatu in prima
liga. S’hè passatu ciò ch’ellu avia dettu
Casoni à l’iniziu di a stagione : “a
squadra tene a strada, solamente, ùn ci
vole micca ch’elli ci sianu feriti, osinò
ùn ci ne surtiremu micca”.
U Rib. : Sicondu voi, in fine di stagione,
u Sporting hà pagatu u fattu
ch’ellu ùn avia micca abbastanza
ghjucadori ?
C. O. : Ghjè un prublema d’effettivu.
Quand’ella hà mancatu a “charnière
centrale”, hè statu una catastrofa ! Ùn
c’era micca cumpensazione. Face parte
di i prublemi di u Sporting, di i mezi
ch’ellu hà u club per ricullà in prima
liga. Anu fattu una squadra chì tinia a
strada, ma per assicurà un rimpiazzante
à tutti i posti per andà sin’à a fine di a
stagione ùn hè micca statu pussivule.
U Rib. : Per a stagione chì vene,
cumu si prisenta per u Sporting ? Ci
hà da esse novi ghjucadori ?
C. O. : Ci hà da esse novi ghjucadori,
sicondu mè, si prisenta di listessa manera
chè annu. Ghjunghje Mendy, hè
viramente un bon ghjucadore. Face un
attacante in più, incù tutti quelli di
annu.
U Rib. : Née ùn piglia micca a so
ritirata ?
C. O. : Nò, Sarebbe bè chì Née
cumpenseghji un pocu ciò ch’ellu hà
mancatu annu. Hè statu un pocu in
daretu... Sè ùn avemu micca feriti,
avaremu una squadra chì tene a strada.
L’avvene di u club ghjè a furmazione.
Quist’annu sortenu uni pochi di giovani.
Per l’arrulamentu di i ghjucadori,
aghju datu qualchì casata per via di i
mo cuntatti incù Canal +. Quessa pò
esse un aiutu in più per u club, perchè
Canal + sò elli chì tenenu u ballò in
Francia. Nant’à stu puntu, aghju da
attivà tutti i mo cuntatti.
U Rib. : Pinsate chì u Sporting
avarà quist’annu i mezi di luttà per
cullà in liga unu ?
C. O. : Ùn ci hè micca ragiò ! U
Sporting di quist’annu hè listessu di
annu. In più, avemu à Mendy, un attaccante.
U Rib. : Iè, ma
anu da mancà
Jau, Diane,
Sauget...
C. O. : Ci vole à
pinsà ch’elli sò piuttostu
mezi terreni.
Mendy hè più attaccante.
Eiu pensu
ch’ellu ci una forza
di penetrazione più
impurtante quist’annu.
U Rib. : A piazza
di u Sporting hè in
Liga Unu?
C. O. : Tutti vularianu
vede u Sporting
in prima Liga. Sò
tutti avvezzi. In giru
à mè, a mi dicenu.
U Campiunatu di
Liga unu senza una
squadra corsa, ùn
anu più l’abidutine.
A carriera di
ghjucadore
U Rib. : Avete scrittu e più belle
pagine di a storia di u Sporting, in
78, è ùn sò tante numarose e
squadre di u campiunatu di
Francia chì sò andate sin’à a finale
di a Coppa di l’UEFA. Cumu spiegate
chì u Sporting ci l’appia fatta ?
C. O. : In 76/77 c’era digià un gruppu
sulidariu, c’era una grossa magiorità di
corsi, chì eranu ghjucadori lucali è si
parlava corsu, ancu à l’intranamentu !
Quelli chì ùn capianu micca, peghju
per elli ! C’era un spiritu, una mentalità.
I ghjucadori chì ghjunghjianu s’adattavanu
à a nostra manera di ghjucà. Li
faciamu vede subitu a nostra manera di
fà, u nostru ghjocu. M’arricordu
quand’elli sò ghjunti ghjucadori cum’è
Lacuesta o Larios, l’avia detta “O Jean-
François, si tu vas jouer comme ça, ça
ne nous intéresse pas ! Il en faut plus.”
Eranu forti tecnicamente, ma entravanu
ind’è u nostru sistema di ghjocu. Si
alzavanu à i nostri valori, à a nostra
manera di ghjucà, à u nostru spiritu. U
match era un spetaculu ! Era vinutu u
publicu, ci vulia à falli piacè. Ci vulia
chè i match fussinu animati. Ci vulia à
ghjucà à 100 per 100. Senza calculà,
senza riflette à l’avversariu, senza pinsà contr’à quale ghjucavamu, simu ghjunti
in finale. M’arricordu ancu chè Cahuzac
mi dicia : “Ai u tale à marcà, u tale à
marcà”. Ùn li cunniscia mancu ! Eranu i
più grandi d’Auropa, n’avia intesu
parlà, ma micca di più... Ghjera a mentalità,
u spiritu chè aviamu.
U Rib. : Avete fattu tutta a vostra
carriera à u Sporting, à parte pendente
u serviziu militare quandu
avete ghjucatu à u Red Star. Avà ùn
si vede più. I ghjucadori stanu dui
o trè anni ind’è un club è dopu si ne
vanu. Chì ne pinsate ?
C. O. : Hè cambiatu u sistema...
U Rib. : Ma i cuntatti per parte,
l’avete avutu ancu voi ?
C. O. : Iè, aghju avutu pruposte di
Saint-Etienne, Parigi, tandu era Paris
FC ! Ma parte per vince dui millioni di
più in Saint-Etienne per esempiu, allora
chè ind’è u mo spiritu, u più impurtante
era di fà una cariera incù u
Sporting, ind’è a gloria è per l’onore,
per a Corsica. Chì riprisenta Saint-
Etienne ? Ghjucà in Corsica era sfarente.
C’era un ideale. Ghjochi per u to paese,
quessa ghjera impurtante. Quessa ùn ci
hè soldi per pagalla.
U Rib. : 81, vittoria in coppa di
Francia. Ghjè a siconda più bella
pagina di a storia di u club. Qual’è
chì vi hà purtatu sin’à a vittoria ?
C. O. : U spiritu era listessu. C’era
sempre ghjucadori corsi. Paul, Claude,
eiu è tanti altri. Aviamu un spiritu di
coppa, un spiritu di vittoria.
M’arricordu contr’à Martigues, aviamu
persu 3 à 0 ind’è elli. À u match ritornu,
davant’à i nostri supporter, aviamu
una voglia di vince di quelle. Emu
vintu 5 à 0. Quessi sò mumenti chì ùn
si ponu pagà !
U Rib. : Chì ci vulerebbe à fà per
ritruvà stu spiritu à u Sporting
ughjincu ?
C. O. : Ci hè troppu muvimenti di
ghjucadori. Ci hè un sistema in ballu :
un ghjucadore vene di un club, và
ind’è un altru. Anu un annu di cuntrattu,
dui anni. Ùn anu più u tempu di
mettasi in capu per qualli ghjocanu.
Facenu ghjustu u so travagliu, a so carriera.
À u sporting, ci ferma i dirigenti
per dà quell’impusione, stu spiritu à i
ghjucadori per ch’elli riprisentinu a
Corsica cumu ci vole.
U Rib. : Per mantene u spiritu di
un club, i più grandi d’Auropa
facenu vultà l’anziani ghjucadori, à
l’imagine di u Real di Madrid, di a
Juventus o di u Milan AC. U
Sporting ùn l’hà mai fatta è voi site
l’esempiu di ciò ch’ellu ci vulerebbe
à fà...
C. O. : U Sporting ùn l’hà mai fatta.
Ùn sò micca perchè, u club ùn s’hè mai
appughjatu nant’à l’anziani. Eiu, sò
sempre statu vicinu à u club, aghju
sempre resu serviziu, cum’è a pudia fà.
À propositu di l’aiutu, noi à u
Viscuvatu, avemu u stadu à dispusizione
di i giovani di u Sporting dipoi
10 anni. Aiutemu u Sporting à traversu
à mè, postu chè sò presidente di u club
di ballò di u Viscuvatu. Hè vera chè
sarebbe bè d’avè l’anziani ghjucadori
impignati ind’è u club.
Intervista fatta in lingua nustrale
da Ghjuvan Filippu Antolini
