U PADDUC hè un ducumentu
dettu strategicu. Hà da ingagià
a Corsica per e dicine
d'anni à vene in quantu à e so urientazioni
maiò. Benchè cunfinatu in u
guadru di u statutu attuale, riprisente
una vera scelta di sucietà per stu
paese. Hè a legge di 2002 chì privede
stu ducumentu è e so mudalità d'elaburazione
: tocca à l'esecutivu di cuncipì
u ducumentu. A maggiurità
attuale hà pigliatu u partitu di schisà a
vulintà pupulare è d'ùn ricircà micca
un prughjettu cunsensuale. Tandu, stu
Pianu di sviluppu ùn pudia cà traduce
l'urientazioni di l'eletti à u putere à
l'Assemblea Tarrituriale. Manchendu
st'appuntamentu ch'avaria pussutu
parmette à i Corsi di traccià a via di u
s'avvene, anu vulsutu impone à un
populu e brame d'unepochi. Hè cusì
ch'hè crisciuta à pocu à pocu l'uppusizione
à partesi da u muvimentu
naziunale è da i difinsori di l'ambiu.
Fattu è fine chì a mannata d'urganizazione
schirzata da Ange Santini hà
vistu una maggiurità di l'eletti tarrituriali
sprime un ricusu di principiu à u
pianu di l'esecutivu. Tandu, sarà pò
digià mortu stu PADDUC ?
Un campu di u « sì » ?
Hè verità chì u campu di u ricusu hè
bellu largu è accoglie in u so senu
ghjente à l'idee varie. Ma da l'altra
parte, u prublema si piglia à l'arringuerciu
: furtunatu à quellu chì pò
definì i partigiani di u ducumentu à
l'infora di quelli chì l'anu cuncipitu !
L'UMP pare bella sola da difende tale
scelte. U MEDEF unicamente pare
sottuvoce di sulidarizassi di l'esecutivu,
ciò chì pare logicu à a lettura di
u PADDUC è di a so andatura ultraliberale.
Staccati da à pocu pressu
l'unanimità di ciò ch'omu chjama a «
sucietà civile » (associi, sindicati,
camare cunsularie, Università…) hè
avà a sfera pulitica corsa chì per a so
maiò parte ricusa stu pianu. U 31
d'Uttobre scorsu eletti di l'Assemblea
(29 nantu à 51) anu dettu à so uppusizione
à e facende di l'esecutivu
dinunziendu una « mancanza ind'è u
dibattitu demucraticu ». L'anzianu prisidente,
Jean Baggioni stessu hà sprimatu
è so riserve à stu sughjettu.
L'uppusizione trapassa u guadru di
quelli chì Ange Santini definiscia
cum'è « aiattollà verdi » è militenti
radicali in pienu sprufondu puliticu.
À tal'puntu chì c'hè da
dumandassi quale pò difendu stu
ducumentu, è perchè ?
Attenti à u Pianu « B » !
Stu ducumentu hè da tutti i so aspetti
un spripositu : affirma sciffri falsi, prupone
misure digià in ballu, ùn scaccia
nisuna andatura di sviluppu veradimentu
durevule à longu andà. E so
pruposte infine ùn piglianu in contu
ne a situazione internaziunale, ne l'arnesi
necessarii à a so messa in sesta.
C'hè da intarrugassi in quantu à u
seriu d'un ughjettivu di crescita à 5 %
l'annu in u cuntestu finanziariu di sti
pochi tempi, in uppusizione tutale cù
quellu di « sviluppu durevule ».
D'altronde è paradussalmente, sò
quelli chì anu impeditu per una
grande parte l'uttenzione d'un POSEI
à u livellu fiscale ind'è l'annate 90 chì
parlanu di passà d'un sucietà di cunsumu
à una sucietà di pruduzzione :
incù chì arnesi ? Eccu induv'ella si
trova a sfida di stu PADDUC : chì u
populu di stu paese pigliessi in manu
u so distinu prupunendu a so scelta di
sucietà. Stu PADDUC hè da ricusà hè
abbisogna ch'ellu ùn manchessi un
solu votu di quelli chì oghje dicenu i
so dubbiti, ma un PADDUC, un pianu
d'accunciamentu hè nicissariu. Ci
sarà un « Pianu B », ma attenti à
quellu quandu si sente u gruppu PRG
sprime attempu a so uppusizione à stu
ducumentu ma a so campa di leghje
una vulintà di vede cresce di manera
forte a demugrafia di a Corsica… cun
ghjente vinuta d'altrò...
Petru Antone Tomasi
