A crunichetta di Petru Vachet-Natali
Sti pochi tempi, ci hè statu in Parigi u
salone di u libru. À visitàllu, hè ghjuntu
ùn sò quanta ghjente ; parechje millaie,
ci n’era d’ogni razza è d’ogni mamma.
A Corsica dinù era riprisentata da un
associu chì « prumove u libru corsu » o
piuttostu l’edizione in Corsica perchè i
libri corsi, scritti in lingua nustrale, si
facenu rari . À quale a colpa ?… nè
riparleremu dopu …
Hè statu custì invitatu - o s’hè invitatu
- u sgiò filusofu Bernard-Henri Lévy per
dedicà u so’ ultimu libru : American
Vertigo.
Eccutilu ziffrendu à più putè, scamisgiulatu
cum’è di solitu … In più bella,
ghjunsenu, cotuli cotuli dui visitatori
clandestini, facciscuperta à torte in
manu … ti l’anu fàttu, à colpu, dui
attentati pastizzeri chì m’ete capitu ! Ci
era crema chantilly dapertuttu, n’avia
pienu u muccighile è i so’ capelli eranu
diventati tutt’annivati. Furtuna per quessi
chì a moglia, Arielle Dombasle ùn ci
era !…
Si vede chì l’intortatore belgu, u sgiò
Noël Godin, hà fattu emuli .
Pè rivenene à a cultura corsa, in lu
primu numeru di « A Nazione », a miò
crunichetta « Canapu », dicia ch’ellu « si
aspettava subvenzioni pè a cultura corsa
è micca sempre pè e culture in
Corsica. » Oghje chì u miò tema ne
parla, l’accertu ; per contu meu, tutti i
miò libri, l’aghju scritti à contu d’autore.
E subvenzioni ci sò à banghate ma vanu
spessu à d’altra ghjente, à d’altre culture…
Macaru a miò penna ferma libera ;
pòssu scrive puesie chì parlanu d’indipendenza
è di libertà ! (1)
Dighjà, In lu 1982, in una puesia titulata:“
Tempurale“ scriviu una alleguria
chì parlava cusì di a Corsica è di
manghjoni :
- « Cum’è una caspa bella matura,
- Ti vegu di suchju cusì piena,
Li so (to) corbi à la panza serena
Si ne techjanu senza paura…» (2)
M’aghju da fà nemici è mi ne impippu ;
oghje a vogliu palisà ! Quindi, ci sò strani
cumitati di lettura, spessu ghjente
incapace, intrigante, piazzate o sia
impustori auto-pruclamati. Facenu a
censura è dànu i soldi publichi à chì
li pare. Ci vole ad esse puliticamente
currettu ! Qualchi specialisti, per
ottene subvenzioni, pruponenu libri
scritti in francese à buzeffu ma scritti
in corsu quasi micca ossinnò asettisati,
distillati è chì piaceranu à u principe.
Certi sò ghjudice è partitu !! In
sti famosi cumitati, parechji, u corsu
ùn lu cunnoscenu ; allora, spessu, sceglieranu
à l’azardu libri « alibi » .
Pè tutte l’altre forme di cultura,
ghjè listessa canzona ; firmemu à
quelli tempi quandu I Muvrini ùn
putianu cantà in certi paesi di
Corsica …
Pè l’edizione, ne simu sempre à
trent’anni fà. Censura è auto-censura.
Scrive in lingua corsa hè cunsideratu
cum’è subversivu ; ancu da
certi chì si dicenu culturali corsi !
Pensendu à què’ è sopratuttu
avàle ch’aghju intesu e belle canzone
di i nostri amichi I Mantini
chì ci contanu a storia di « tutti
‘ssi scurnachjoni…» m’hè pigliatu
l’estru…
Postu ch’ella hè cusì, focu à a
ceppa ! Surteremu l’artiglieria ;
particularmente quella di l’attentati
pastizzeri corsi…(L’A.P.C.) E
munizioni ùn mancanu qui !
Vi ne vogliu sottumette trè ch’omu
aduprerà senza ritegnu alcunu
contru à certi chì si ricunnosceranu !
Ognunu sceglierà u so prughjettile
tra quelli citati quì sottu.
U primu serà u pastizzu di semula
cun l’uva secca dentru ; altu un
mezu palmu, quessu pare caucciù è
ribomba da fà un pass’è veni, intortendu
duie persone à tempu !
S’ella ci hè caramella nantu, ferà
ancu più danni !
U secondu serà a torta pisticcina (o
castagnina) ricuperta d’una bella fittera
di brocciu frescu da schizzillà
dinù, nantu à tutti i capurali chì sò
vicinu è chì manghjanu (i brusgiuli
chì cascanu quì è culà.)
U terzu, u tengu pè a fine, serà a torta
paisana Cerviuninca ; zeppa zeppa
bella soffice è umbule, cun un ditu di
cicculata nantu, tutta cunstellata di cacaronzuli
tupini inzuccherati d’ogni culore
di quelli chì s’incrustanu innu a barba è
mustacci !
Ma aiò, postu chè no’ simu in li tempi
pasquarecci, tempi di pace è di santità,
spera truvànne unu, omu o donna,
rispunsevule è primurosu(a) d’aiutà
vera cultura corsa ; quella chì parla,
canta è scrive in lingua nustrale.
À quessu(a) li si attribuiscerà in grande
pompa u campanile (o caccavellu) d’onore
!
Sta perla rara, ricevendu u so premiu,
serà accumbracciatu(a) da una bella
vahiné corsa chì li passerà in giru à
collu u campanile (caccavellu) tale una
curona di fiori di tiaré offerta à i furesteri
quand’elli ghjunghjenu in Tahiti.
Secondu u so’ meritu, li si puterà ancu
aghjustà ove dure cum’è tanti galloni
stelle, cusì, più ci serà ove nantu, più issa
distinta persona serà onorata.
Allora, per compie, à voi di ghjudicà
per qualessi seranu e torte è per quale
serà u campanile (caccavellu).
Amichi, m’avete lettu ; dunque site
leghjittimamente abilitati per fà pruposte…
À prestu dunque pè a ghjuria ! …sò
ùn mi pigliu qualchi gallu in cicculata
nantu à u tupezzu !
Petru VACHET-NATALI
Stu 17 d’Aprile 2006, ghjornu di
merendelle è di campanili (caccavelli)
(1) Vede u miò ultimu libru : ( Puesia
acrostica ; « A miò speranza ») in
« FULLETTI » vindutu 15€ + 2€ pè
spese di posta. (Vindutu unicamente
indè l’autore.)
(indirizzu : Petru VACHET-NATALI
- FICAGHJA - 20237 A PORTA .)
(2) In « MI RALLEGRU » in « SFIACCULATE
» è in « FULLETTI . »
