Omu ùn pò cuncipì di parlà
di a sorti attuali di l’indiani in
America senza evucà u
casu di a sorti fatta à un
prighjuneru puliticu di u
populu di i siussi è cundannatu
trent’anni fà à a riclusioni
à a perpetuità. Iss’omu,
Liunardu Peltier hè divintatu
u simbulu di a lotta è di a
risistenza di i populi indiani
nigati in tarra soia da i Stati
Uniti.
I fatti
Hè pà omicidi nant’à dui agenti di u
F.B.I. chì Liunardu Peltier hè statu
cundannatu à a perpetuità u 2 di
ghjunghji di l’annu 1977 in Fargo,
ind’è u Dakota di u nordu. Faci dunqua
ch’iddu hè imprighjunatu dipoi u
1976, dipoi issu mumentu induva
l’ani incarciratu.
A morti di issi dui agenti federali hè
accaduta à u mumentu induva u
F.B.I. dipoi parechji anni circava à
indibulì è à impediscia a crescità di u
muvimentu di rivindicazioni di l’Indiani
chì mettini in rilievu a nigazioni
di i so dritti. Nascia dunqua l’American
Indian Movement chì impauria u
puteri americanu di l’epica è Liunardu
Peltier hè unu di i so militenti.
L’American Indian
Movement in lotta
U scopu di issu muvimentu indianu
hè di fà cunnoscia à a ghjenti i cundizioni
di vita dramatichi di tutti issi
populi inchjustrati. Urganisighja dunqua
parecchji azzioni spittaculari ma
micca viulenti comu in u 1970 cù
l’uccupazioni di u forti Lawton o
comu a marchja intrapresa in u 1972
pà dinuncià i trattati viulati è chì si
cumpeia cù l’uccupazioni di u scagnu
di l’affari indiani in Washington.
U F.B.I. in azzioni !
Di pettu à a crescita di issa mubilisazioni
pupulari, u guvernu americanu
di l’epica, sottu à a prisidenza di Riccardu
Nixon metti in ballu uni pochi
di manipulazioni pà distabilizà u
muvimentu. Riesci dunqua à fà nascia
ind’è a riserva di Pine Ridge, riserva
di i Siussi, una milizzia chì prova à
rimetta l’ordini impostu da u
guvernu. Issa milizzia chjamata «
Goon Squads » sarà pà via di a so
attitudina à l’urigini di l’occupazioni
chì hà duratu più di trè mesi di u
paesu storicu di Wounded Knee.
Dopu hè u tarrori chì insanguinighja
u muvimentu : più di 80 parsoni sò
assassinati. Ghjunghja à l’aiutu,
l’American Indian Movement è una
matina di ghjunghju di l’annu 1975 à mezu à i pruvucazioni di a milizzia è
di a pulizza dui agenti federali trovani
a morti, in cundizzioni micca
troppu chjari.
Criminalisazioni e
arristazioni
A’ a seguita di issa fucilita, s’intraprendi
in senu à u guvernu, una
campagna mediatica chì circa di criminalizà
u muvimentu indianu. Quattru
parsoni sò ricircati, frà iddi Liunardi
Peltier. Dui di i parsoni fughjiti
passani in prucessu ma sò rimissi in
libartà. Peltier, iddu hè arristatu à u
Canada, purtatu in America è ghjudicatu
ind’è a cità di Fargo. A’ malgradu
i stessi cundizioni di testimunienza
chì ani parmissi di cappià dui
di i so amichi, Liunardu Peltier hè
cundannatu senza prova à a perpetuità…
« Un’ sminticaraghju
micca à Liunardu Peltier
»
Faci dunqua dapoi più di trent’anni
chì issu militenti simbulu di a lotta di
l’Indiani in pettu a l’uppressori americani
hè ditinutu dopu à a so cundanna
senza prova… Dapoi anni è
anni i so avucati ani piddatu parechji
iniziativi pà circà di rimetta in causa
l’inghjusta sorti di Liunardu Peltier,
ma sin’à avali ùn sò riusciuti à fallu
escia è à fà ricunnoscia i so dritti di
parsona nucenti. Una mubilisazioni
intarnaziunali hè stata missa in ballu
chì, da Amnesty International à certi
parsunalità cum’è Nelson Mandela o
Desmon Tutu, circa à pupularizà a so
sorti è à pisà annant’à l’apparechju
ghjudiziariu chì sin’à avali ùn s’hè
mossu… Ancu Bill Clinton l’avia ditta
in a so campagna d’alizzioni : « ùn
sminticheraghju micca à Liunardu
Peltier »… ma l’hà lacatu in fondu à a
so cellula…
E’ avali ?
L’omu hè curaghjosu è ùn hà rinunciatu
à a so lotta è à u so ideali. A
mubilisazioni cuntinueghja dapertuttu
ind’è u mondu, fendu cunnoscia à u
niveddu intarnaziunali a lotta di tutti
issi populi indiani nigati ind’è u so
essa. U solu crimini di Liunardu Peltier
hè oghji chjaru è indentificatu :
hè u fattu di essa un Indianu chì s’hè
battutu è chì si batti sempri pà i dritti
naturali di l’Indiani. Oghji pà monda
ghjenti Liunardu hè un simbulu universali
di quiddi chì luttani parchì
l’omu campessi di i so diversità è sfarenza
in pettu a issu uppressori mundiali
chì hè l’America è chì si pidda
pà u ghjendarmu di u mondu.
Ulivieru Sauli
