Qual’hè chì ùn cunnosce i « schtroumpfs », issi
picculi persunaghji di strisce dissignate è di cartoni
animati chì s’assumiglianu à fulletti chjuchi
chjuchi, è chì sò aspessu perseguidati da u gattivu stregone
Gargamel è u so misgiacciu Azraël ? Eppuru, ùn sò
forse tantu numerosi quelli chì sanu qual’era u babbu di
i « schtroumpfs ». Petru Culliford nascì in Brusselle in
lu 1928. Stu belgicu, d’origine brittanica da a parte di u
so babbu, travagliò ind’è una salla di sinemà cum’è aiutareghjicabina*,
poi à la C.B.A., un studiu di disegni animati,
induve scuntrerà trè amichi chì diventeranu autori
di prima trinca ind’è u campu di a banda dissignata :
Franquin, Morris, è Paape. Dopu à u fallimentu di
C.B.A., Peyo si vultò ver di u disegnu publicitariu, per
circa un annu, poi principiò timidoni a so carriera ind’è
a banda disignata cù una participazione discreta in qualchì
giurnale.
Da « Johan è Pirlouit » à a
nascita di i « Schtroumpfs »
In 1942 creò unu di i so primi è più impurtanti
persunaghji, Johan, giovanu eroe di u medievu,
pagiu à u serviziu d’un rè. In lu 1952, tappa
decisiva, Peyo entrò à u giurnale « Spirou »,
incù l’appoghju di u so amicu A. Franquin, è
dui anni dopu, ind’è un albumu di l’aventure di
Johan apparì un novu persunaghju, maliziosu
è stuzzicaghjolu, Pirlouit, scuderu è amicu fidatu
di Johan chì ùn duvia più lascià lu. Johan è
Pirlouit, persi ind’è u « Paese maladettu » scuntronu,
in lu 1958, picculi esseri turchini assai
strani, alti di cinque pollici : eranu nati i
« schtroumpfs ». Dapoi i nostri amichi fulletti
anu avutu i so proprii stalvatoghji cuntati in
una seria d’albumi è ancu ind’è cartoni animati
; oghje u mondu sanu i cunnosce è facenu
sempre ride o sunnià giovani è vechji. Peyo hà
criatu parechji persunaghji, cum’è Benoît
Brisefer ( Spirou-1960) è d’altri, ma a fama di i
« schtroumpfs » i supraneghja tutti. È supraneghja
dinò a rinoma di l’autore stessu. Di sicuru,
sò pochi quelli chì sanu cumu fù sceltu u
cugnome di « Peyo » ; Semplicemente perchè
u so niputinu, incapace di prununzià « Pierrot »
cum’è dicianu tutti in casa, u chjamava cusì. È
quessa abbastò perch’ellu scegliessi per sempre
u so nome d’autore.
U « paese schtroumpf »
Peyo morse u 24 di dicembre di u1992, una
veghja di natale ; certi zitelli accertanu chì hà
vulsutu facci un ultimu scherzu incù u s’amicacciu
Pirlouit è chì l’anu visti tramindui andassine
nant’à a slitta di Babbu Natale. I « schtroumpfs », elli,
fermanu quì cù noi, rammintenduci cusì bè i nostri difetti,
e nostre debulezze, ma dinò e nostre brame. U so
paese s’assumiglia appena à la nostra sucietà corsa incù
e so vicinanze è e so cuntradizione, circandu ognitantu
aiuti da fora, ma cunfruntata aspessu à periculi maiò chì
venenu d’altrò. Tandu ci hè pigliata a voglia di rende un
picculu omagiu à Peyo incù un disegnu chì ghjè à tempu
un’ochjata à l’attualità pulitica. Ùn hè mai compiu u
dibattitu annant’à u fattu ch’ellu si possi o nò ride di
tuttu, ma di sicuru l’umorisimu ùn aggarba tantu i stregoni
è tutti i Gargamel di u mondu ; ghjè dinò un’arma di
più contr’à tutte e so maganze.
Petru Culliford
*Aiutareghjicabina : assistant projectionniste.
