Hè isciutu dopu à parechji anni
di prighjò. Hè isciutu dopu à
più di 19 anni passati in cellula.
Hè cunnisciutu pà u so ingaghjamentu
puliticu è a pulizza è a ghjustizia
francesa li rimprovani d’essa un militenti
di l’urganisazioni « Iparretarak ».
À a so surtita, i so primi paroli sò stati
prununciati pà u so paesu, è u so avvena.
L’idea quand’idda hè ghjusta,
quand’idda s’appoghja nant’à l’amori
di una tarra è di un populu nigati ùn pò
micca scruchjulassi cù u tempu...
Ritrattu
Filippu Bidart hè nanzi tuttu un Bascu
arradicatu à u so paesu. Più particularmenti
à ciò chì si chjama
« l’Ipparalde » chì voli dì u Paesu
Bascu di u Nordu. Hè stitudori, è trà
l’anni 1975 è 1980, diventa insignenti
di a so lingua, « l’euskara », ind’è issi
primi scoli custruiti apposta è chì si
chjamani « Ikastola ». Cuscenti di a
situazioni pessima nant’à parechji piani
ch’iddi sighini suciali, ecunomichi,
dimugrafichi, pulitichi, Filippu Bidart
s’ingaghja ind’è un muvimentu pubblicu
« Herri Talde ».
Iparretarak
Hè ind’è issi mumenti ch’idda appari
« IK » o « Iparretarak ». Hè un’ urganisazioni
di patriotti baschi chì adoprani
una lotta pulitica è armata. Issa
scelta specifica poni quantunqua prublema
à u mumentu induva l’E.T.A.
ind’è a so strategia storica analiza piuttostu
l’opportunità di una lotta armata
nant’a u paesu uccupatu da i Spagnoli.
« Iparretarak » si prisenta comu un’urganisazioni
sucialista e rivoluzionaria
di libarazioni naziunali. In 1983, faci
soia a rivindicazioni d’autonomia cunsiderendu
quissa comu una tappa pà
l’indipendenza.
Morti di dui CRS
Di marzu 1982, dui CRS sò tombi.
D’austu 1983 hè un ghjendarmu chì
trova a morti. Issi dui fatti sò missi
nant’à u contu di iss’urganisazioni.
Filippu Bidart hè allura ricircatu. In
1988 hè incarciratu è in 1992 hè cundannatu
à a riclusioni criminali à perpetuità
pà l’affari di i dui CRS morti à
Santu Stefanu di Baïgorry, è di un
ghjendarmu in Biscarossa. A ghjustizia
francesa u cundanna dinò à 20 anni di
prighjò pà a fucilita di Leo induva un
ghjendarmu hè mortu è un altru hè statu
feritu.
I primi passi
T’hà oghji 53 anni, è dopu à quasgi 20
anni d’incarcirazioni, esci da a prighjò
di Clairvaux. Ùn hà callatu u capu. I so
idei un ani cambiatu. « Paxi » (hè u so
cugnomu in bascu) rammenta chjaramenti
a situazioni ughjinca di i 600
prighjuneri pulitichi basci cù una pinsata
più particulari pà Inaki de Juana in
greva di a fami. Rammenta dinò u so
auguru di andatura di paci chì devi cuncirnà
ancu « l’Ipparalde », è di ùn
pudè rientra in paesu. A camara di l’applicazioni
di i peni s’idda era d’accunsentu
pà parmetta a so libarazioni cundiziunali
ùn era d’accordu pà lasciallu
andà in paesu soiu.
Hà quantunqua fattu i so primi passi
fora di a prighjò è, omu di cunvizzioni
hè firmatu, al di là di l’anni passati in
cellula.
Ulivieru Sauli
