L'8 di maghju di u 1769, a Corsica cunniscia a disgrazia
di Ponte Novu. Stu ghjornu, e milizie
corse eranu sfatte da e truppe di l'armata francese
di u rè Louis XV, a più pudente di l'Auropa
di u 18e seculu, è l'isula perdia a so indipendenza
cunquistata in 1755 di fronte à a Republica di
Genuva. Parechje centinaie di Corsi, arritti è fieri, sò
morti pè difende a libertà è
l'opera pulitica di un omu,
Pasquale Paoli, chì avia datu à u
so populu un Statu, incù una custituzione
republicana è demucatica,
chì facia l'ammirazione di
l'Auropa di i lumi è chì era vistu
cum'è un mudellu à seguità. In
Ponte Novu i Corsi anu mustratu
una vulintà, un curaggiu, una
fede tremenda ind'è a Nazione
corsa, è, parlendu di a battaglia
è di l'attitudine di i patriotti
corsi à u cumbattu, Voltaire
dicerà chì " si vede tal azzioni
chè ind'è i populi liberi ".
Sta memoria hè nostra è ùn si pò
squassà. Perchè l'anima di a
Nazione ùn hè spenta è chè no
simu l'eredi di st'eroi. Teneremu
sempre à mente u so sacrifiziu
maiò, è cù rispettu è devuzione,
anderemu, ogni annu in Ponte
Novu, à salutà a croce di u
ricordu è à lampà fiori in fiume
Golu. Ghjè un attu di cuscenza
pè tutti quelli chì volenu custruì
un avvene novu. Sta storia hè nostra è ùn si tacerà.
Appartene à i Corsi, à tutti i Corsi sicuramente, ma forse
ùn hè quella di u partitu francese chì hà traditu l'interessu
culletivu pè u soldu è u putere. Pè noi, dipoi u
ghjornu funestu, u filu ùn hè rottu, è malgradu a pacificazione,
a ripressione, e falzità, a Corsica hè sempre
viva è cerca à ritruvà a so libertà persa, scrocca. Iè 238
anni dopu, d'altre generazione cuntinueghjanu à luttà, è
d'altri cumbattenti anu datu libertà ò vita pè ch'ellu
campi u populu corsu. Quanti Corsi sò torna oghje ind'è
u bughju di e prigione francese per avè fattu valè e nostre
sperenze è i nostri diritti ? Un
ci ne scurderemu, è stu 8 di
maghju ognunu penserà à tutti i
patriotti chì sò cascati pè a
Corsica : quelli d'eri cum'è quelli
d'oghje.
Sta lotta hè nostra è ùn si pianterà.
In st'annata di u bicentenariu
di a morte di " u Babbu di a Patria
" a fiaccula di a resistenza hè sempre
accesa è u cumbattu ùn hè
compiu. Purtemu sempre u laziu
di un populu chì ùn vole more è
l'unità ritrova di i Naziunali permetterà
dumane d'esse, di vultà,
ind'è u cuncertu di e Nazione
libere di u Mediterraniu è di
st'Auropa chè no avemu stunata
dui seculi fà.
A ragiò hè a nostra forza. Pugni
alzati è bandere alte, seremu
sempre quì.
Battì Lucciardi
