In Merusaglia, i militanti di l'Unione Naziunale anu rimessu una spada à a statula di u
Babbu di a patria. In Ponte Novu, eranu numarosi per a messa di u ricordu, in mimoria à
tutti i martiri di a battaglia di u 1769.
Cum'è tutti l'anni, l'ottu di
maghju, i corsi eranu invitati à
salutà a mimoria di e milizie
da Pasquale Paoli chì aviavu fattu
fronte, cù curaggiu, à l'armata francese
di u Rè Louis XV, a più pudente di
l'Auropa di l'epica, pè difende a libertà
è l'indipendenza di a Corsica.
Più di 300 persone, militanti
naziunalisti è paisani, s'eranu
adunite in principiu di serata
pà stà à sente una messa in
lingua corsa, detta da u prete
Mondoloni, è cantata da
parechji giovani di u circondu.
Si hè compia nant'à u ponte,
induve sò stati lampati mazzuli
di fiori in omaggiu à sti
patriotti morti 236 anni fà.
A ceremonia hè stata una
stonda d'emuzione, un attu di
memoria di una cumunità à
l'antichi, di cuscienza, di fede
ind'è a Nazione Corsa è un
avvene di megliu stà. U ricordu
di Ponte Novu hà permessu
dinò di ramintà chì u filu di
a storia ùn hè rottu è chì e
sperenze di u populu corsu
eranu vive. Iè, a fiaccula di a resistenza
hè sempre accesa è u sacrifiziu
di quelli d'eri, è i sò fatti di gloria, sò
un fanale à seguità pè tutti quelli
d'oghje chì lottanu. Per quessa, pinsemu
forte à tutti i nostri fratelli, chì,
dipoi a leva di u settanta, sò stati
incarcerati ò chì sò cascati à u cumbattu.
U populu corsu
ùn pò sparisce è a so
forza serà dumane di
vultà versu i chjassi di
a libertà, ne simu sicuri.
In Merusaglia, u
cumitatu di l'Unione
Naziunale di a
Castagniccia è di Golu
hà fattu listessu ghjornu
un'opara suprana.
I militanti di l'Unione
anu rimessu una nova
spada à a statula di u
babbu di a Patria, à
l'intrata di u paese. un
gestu simbulicu è una
conferanza per ramintà à u populu
corsu, sempre privatu di a so storia,
ch'ellu ci hè in Corsica una Storia è
ch'elli ci sò l'omi chì l'anu scrittu,
cum'è Pasquale de Paoli chì hà messu
in sesta a prima dimucrazia muderna
d'Auropa.
Battì Lucciardi
