Francesi si sò sceltu da prisidenti u candidata
di dritta à discàpitu di a candidata di
manca. Poca a campagna da compia à a vighjila
di l'alizzioni cù un duellu pocu quentu !
Di fatti u "faccia à faccia" chì ci hè statu era statu scineghjatu
cù minuziosàghjina da i stati maghjori, i media è l'istituti
di sundaghju. Ma à a purfini i Francesi ani ancu à sapè
s'eddi t'ani un prisidenti, un capu di tribù o un pritonu... In
un paesi chì l'eserciziu parlamintariu riprisenta u gradu zeru
di a dimucrazìa, chì i riformi indispinsèvuli da rifurmà sta Va
cadenti s'assumìgliani à una fandogna, s'hè sciaccatu in ponti
quiddu chì s'hè sapiutu adutilità da eddu di a prapaganda, a
brutalità è a dimagugìa.
A prapaganda da prima : manipulazioni di l'infurmazioni, arti
di l'illusioni, hè a virsioni militara di a cumunicazioni a più
rudimintali, a bucìa ufficializzata, una spicialità di i "servizia"...
A brutalità, propiu quidda chì prisidi oghji à u rigulamentu di
i cuntinziosi è di l'andatura bona di a ghjustizia chì Anatole
France dicìa ch'edda ùn avìa bisognu d'essa ghjusta postu
ch'edda era a ghjustizia. Sta brutalità prucedurali si pralonga
meccanicamenti in u discorsu pulìticu dundi u tonu marziali
sughjirisci à un uditoriu cundiziunatu chì non solu l'uratori hè
pruvvistu di l'auturità nicissaria, bensì chì u paesi t'hà un bisognu
vitali d'auturità.
A dimagugìa infini : hè l'arti suttili di dì ciò chì l'altri vòlini
senta, d'essa più à manca di ciò chì si credi, più à dritta
ch'eddu ùn hè pussìbuli, più umaniu, più manilargu, più ditarminatu,
a dimagugìa hè u travviamentu assulutu di u pulìticu
ch'edda vesti di i stracci di una falsa murali è ch'edda sbiota
di qualunqua sustanza. A campagna di u novu prisidenti fù un
mudellu di priparazioni, un furmidèvuli spittàculu d'illusionista,
un putsch mediàticu, in somma un veru colpu di Statu
! Chì a Storia c'insegna chì daretu à un tribunu bisugnosu s'ascondi
suventi un pussìbuli caudillo.
I ranochji francesi si sò persuasi chì li ci si vulìa unu rè. Chì
dì di i ranochji corsi à chì ùn li s'hè chersu nudda è chì dìcini
"Maréchal nous voilà !" in nomu di a tradizioni corsa ! Si
pudarà assai parlà sin'ad avè a nosgia di sviluppu è di sirinità
quandu l'aredi digenerati di i dinastìi capuraleschi divèntani
curtighjani grotteschi è attìzzani a viulenza naziunalista di
unu Statu spussatu ? Chì postu da a Corsica in sta Storia mentri
a Francia faci tamantu saltu in daretu ? S'eddu si paragunessi
l'ùltima alizzioni à a nostra spirienza stòrica, s'abbunarà
chì si tratta di u pronunciamento di una camarilla di saltambanchi
è di banditi, aredi di u regimu di Vichy è chì a Francia
hè da veru "l'omu malatu di l'Auropa". In senu à sta cunfusioni,
à i Corsi li tocca à mantènasi in sè, ùn cidendu nienti
di ciò chì i custituisci da cumunità di menti, ùn lachèndusi
spizzà da a vultata di a barbarìa pusitivista. Or chì hè a
Risistenza s'edda ùn fussi a vulintà di ùn lacassi spizzà !
Jacques faggianelli, Traduzione Rinatu Coti
