A’ mumenti, i francesi ani
da fà u so prisidenti. Ma di
a Corsica, a senta à l’unu è
l’altru, ùn si ni parla micca. Ed hè
capitivu. Quandu i candidati si liticani
pà sapè di quali hè a bandera o
quandu tanti seculi dopu à Capet,
temani di perdi a so identità naziunali,
hè meddu par iddi di fà neci di
essa ciunchi è cecchi. Par avali,
nimu ùn hà ancu mintuvatu a
Corsica, ciò chì voli dì ch’iddi ani
scelti a pulitica di u nigà, incapaci
ch’iddi sò di cuncipì a quistioni
corsa di manera glubali. In fora di a
fola di u sviluppu ecunomicu, ùn si
senti mai una pruposta pulitica. Vali
à dì, chè pà i capi pulitichi francesi,
a Corsica devi essa tinuta fora di
storia, fora di tempu, fora di spaziu.
Al di là di l’inghjulia fatta à un populu
sanu, issa manera di ricusà a
prublematica corsa, faci chè l’avvena
prumissu da a Francia pari oghji
beddu bughjicosu è in tantu, a situazioni
pulitica caghjata. Fà chè, in
cunsiquenza, ùn fermani tanti stradi
pà u muvimentu naziunali in fora di
a lotta. Una lotta chì abbisogna
l’impegnu di tutti, di i “naziunali
uniti” è di una cuscenza cumuna
arradicata più chè mai ind’è a storia
di un populu inghjennatu è attempu
unitu da a risistenza. In issu sensu
quì, l’ultimu cartularu di u
Ribombu chì dà a parola à deci
muvimenti naziunalisti, ci insegna
chè a brama di luttà insemi hè quidda
di tutti è u fattu stessu di pudè
torna raghjunà dopu à l’anni di
pazzia, hè u signu maiò chì ci faci
capiscia chè u muvimentu naziunali
hè purtatu oramai da un fiatu novu.
Issi muvimenti sò tutti primurosi di
a sorti di i prighjuneri pulitichi è
tutti cuscenti di a nicissità di lintalli
pà pudè truvà una suluzioni pulitica.
Issu fattu, hè prova di saviezza,
ma massimu di cuscenza nova,
quidda chì ci impara chè ùn ci sarà
suluzioni pulitica si ùn hè quidda di
tutti. Ben’intesu, u pinsà puliticu di
u muvimentu naziunali hè diversu è
a quistioni maiò chì si pona hè
quidda di sapè, sin’à quandu si hà
da pudè accuncià u culunialismu,
un sistema, ci voli à rammintallu,
chì porta in sè u nigà di u populu
corsu. Si pona dinò a quistioni di
sapè si i naziunali t’ani a pussibilità
d’ammaistrà l’istituzioni francesi. A
missa in andà di a Cunsulta
Naziunali hè dighjà una risposta.
Ma tutti ùn sò micca d’accunsentu
pà falla. Ci si pari à noi, chè a
Cunsulta siga l’attrazzu puliticu
maiò di a nazioni in lotta, u locu di
a parola lighjittima di u populu
corsu, u spaziu di a dimucrazia
diretta, u mezu di fassi senta
annant’à a scena internaziunali. Ma
si a Cunsulta devi firmà u scopu di
tutti i naziunali, a so missa in
baddu, par avali, ùn devi micca
impidiscia a ricerca di l’unioni
ind’è l’azzioni, di tutti i muvimenti,
di pettu à u disprezzu di u Statu
francesu, rammintendusi bè issu
dettu paisanu : à chi posa, mal’
pensa.
Dumenicu Tognotti
