U calendariu sculare francese impostu à a Corsica ùn tene alcunu contu di a specificità
culturale, economica è climatica di a nostra isula.
L’ultima riintrata sculare fù, cum’è
dipoi parechji anni, largamentu cuntestatu
per i parenti di sculari è certi
insignanti. Fà parte di l’aberrazione
tecnucratica di l’insignamentu publicu.
Una riintrata trà u 3 è u 6 di settembre
è ancu per certi sculari di u
primariu à a fine d’aostu (e scole
dette “pilote”) È perchè micca una
rientrata u 15 aostu ? Cusì sariamu
sfarenti in raportu à l’altre accademie
francese !
Saria più chè ora chì stu calendariu
sculare fusse accunciatu u più prestu
tinandu contu di a nostra specificità,
ricunnusciuta per parechji statuti putilichi
specifichi dipoi più di vinti anni.
Oghje, e riintrate sculare si passanu
in Corsica à listesse date chè l’altre
accademie, simu cusì à parità. Eccuci
vultati à u dirittu cumunu, cusì caru à
i tecnucrati francesi.
U simbulu puliticu ghjè marcatu,
unu di i scarsi puteri adattatu accurdatu
di primu colpu à l’Assemblea di
Corsica ghjè cascatu.
A Corsica ùn hè a Francia. E sfarenze
sò numarose : u clima, l’actività
turistiche chì primureghjanu, l’animazione
di nostri paesi, a cultura (l’8
di sittembre).
I nostri eletti di a prima Assemblea
di Corsica avianu acquistu è accunciatu
u calendariu sculare di a
Corsica per una riintrata dopu à l’8 di
sittembre. Ùn viaghja più oghje.
Per i nostri paesi, sti ghjorni di
vacanze in più eranu assaì impurtanti.
A ghjente si ne stava di più in
pease, è per l’ecunumia di certe
pieve, era interessante.
Ma sopra tuttu, a riintrata à l’iniziu
di sittembre hè una negazione di a
nostra cultura, è sopratuttu a nostra
religione, è sapemu chì a pratica
ind’è i nostri paesi hè sempre forte.
Saria ora, dunque, chì tutti i naziunalisti
s’impignassinu di manera forte
per chì a Corsica ottena a ricunnuscenza
di a so specificità, è per ch’ella
sia messa in ballu subitu, à a prossima
riintrata sculare.
Digià, quattru anni fà, st’attacca
maiò contr’à a cultura nustrale era
messa à palesu ind’è u ghjurnale « U
Ribombu di a Corsica Nazione ».
Una muzione di l’Unione Naziunale
era stata pruposta in comissione à
l’Assemblea, poi abbandunata. Una
quistione urale ripigliandu sta muzione
sarà posta à a prossima sessione
di l’Assemblea. Eccu u testu :
“U 30 di ghjennaghju di u 1735, i
rapresententi di e sfarente pieve di
Corsica aduniti in cunsulta naziunale
in Corti dichjaronu l’indipendenza
mittendu a Corsica sottu à a prutezzione
di a Santa Vergine è fendu di u
Dio vi Salvi Regina u cantu naziunale
corsu.
Durante sta cunsulta, fù dichjaratu
dinù l’8 di dicembre, ghjornu di l’immaculata
cuncezzione di a Vergine
Maria, ghjornu di a festa naziunale.
Ogni annu dipoi 15 anni, allora chì
ind’è i borghi francesi, i giovani
acculturati zinganu focu à e vitture
senza ragiò, i giovani corsi, elli, si ne
falanu in carrughju l’ottu di dicembre
per chere ch’ellu ne sia fattu un
ghjornu fistivu.
L’Assemblea di Corsica oghje maestra
di u so destinu nant’à stu puntu
ùn pò stà muta di pettu à e brame di
a nostra giuventù. Fà di l’8 di dicembre
un ghjornu fistivu sarebbe dinù
una manera di falla finita incù e
greve di i sculari stu ghjornu è e
manifestazione certe volte viulente.
Avemu un duvere sacru di mimoria
per i nostri antichi è sarebbe un tradimentu
di scurdassi di ciò ch’elli vulianu
per a Corsica. I Corsi chì luttonu
per custruì l’indipendenza à u
XVIIIesimu seculu è chì funu ammirati
è laudati da i più grandi di u
mondu di l’epica ùn sò micca unicamente
l’antenati di naziunalisti corsi,
sò l’antenati di u populu corsu sanu.
Per quessa, dumandemu à tutti l’eletti
di l’Assemblea di Corsica di vutà sta
muzione.
Un’altra data di l’almanaccu hè sempre
stata fistighjata in Corsica, hè l’8
di sittembre, data di a nascita di a
Santa Vergine. In Casamacciuli hè
urganisata una fiera, a Santa di Niolu,
chì dura trè ghjorni. Hè a fiera a più
antica è a più maiò di Corsica. I
Bastiacci vanu sin’à Lavasina à pedi è
certi scalzi per prigà a vergine, i
Bunifazinchi vanu à fistighjà a vergine
à a Trinità... Ind’è noi, a divuzione
per Maria hè sempre di quelle forte.
Basta per esempiu à guardà u numaru
di matrimonii religiosi di maghju o
di sittembre. Ci n’hè pocu è micca, i
Cristiani corsi, per rispettu per a
madonna ùn si maritanu micca di
maghju (u so mese) o di sittembre
(per a so nascita).
E manifestazione intornu à l’8 di sittembre
sò l’occasione per l’artisgiani
corsi di mette in valore e so pruduzzione,
è di vende una parte impurtante
di a so robba, sopratuttu à a
Santa di Niolu.
Sè l’ottu di sittembre ùn casca micca
in fine di settimana, a ghjente ùn pò
participà à st’avenimentu religiosu
impurtantissimu per i Cristiani. Ancu
di più dipoi ch’ellu hè cambiatu u
calendariu scularu. A vede omu, ogni
annu, malgradu i sforzi di l’urganisatori,
s’ella casca in settimana ci hè
poca ghjente allora chì in fine di settimana
u successu pupulare hè maiò.
Tocca à l’Assemblea di Corsica à primurassi
di stu prublema per aiutà
l’artisgiani, quelli chì spessu anu fattu
a scelta di travaglià à l’usu anticu,
st’ultimi guardiani di un pezzu di a
mimoria cullettiva nustrale, l’arte di fà
incù e nostre mani. Tocca dinù à
l’Assemblea di Corsica di permette à
tutti i Cristiani di Corsica di pudè vive
a so religione cum’elli a volenu. Per
ch’i Corsi possanu fistighjà l’8 di sittembre,
femucine un ghjornu fistivu.”
Raimondu Ghjuliu Francescu
Ottomani
