Assai francesi sarianu per l’indipendenza di a
Corsica, micca per filantrupia o amore di l’isula, ma
piuttostu per via chè no li custemu caru, custemu caru
à a Republica francese, è chì i Corsi è a Corsica frenanu
u sviluppu di a Francia. In corte parolle, ùn ci
volenu ! (Ch’elli ùn si ne fessinu, mancu noi). In
quant’à i Corsi profrancesi si puderanu addinuchjà
stridendu « Teniteci ! Vi preghemu di teneci in a vostra
cara republica » è ben innò ! I Francesi ùn li
volenu !
Certi Francesi per contru volenu a Corsica ma senza
i Corsi, tal’è Mussolini chì vulia a gabbia senza
l’acelli (sapia di sicuru quale è no simu, cunniscia
sicuramente a nostra gluriosa storia… a saperanu i
Genuvesi !). Quant’à noi, naziunalisti corsi, chì campemu,
micca in un dipartimentu francese, ma in una
nazione cunquista è senza trattatu, ci cunsideremu
sempre occupati, è s’è no custemu caru à a Francia,
ch’ella ci cappii, ferà qualchì ecunumia (Invece ùn si
dice mai chì a Côte d’Azur o u Cantal costanu caru à
a Francia).
Dicianu dinò di l’Algeria ch’ella custava caru à sta
povera Francia, ma ci hè vulsutu una guerra tremenda
per lintalla.
In fatti, è in fine, m’addirizzu à qualchì « corsu
carne o pesciu », battitevi per esse francesi ricunnisciuti
chì per avà ùn site ricunnisciuti nè da razza, nè
da etnia, nè da populu, nè mancu da francese… in
corte parolle : ùn esistite micca !
Secondu u culunizadore, u paese culunizatu costa
caru, i culunizati anu tutti i defetti di a terra, banditi,
usi barbari, ladri, starcaghji è prufitadori di a generosità
di a republica, è ben intesu corci per u travagliu.
I poveri francesi, ne sapemu qualcosa postu chì i
Rumani i trattavanu d’inghjoccari…
In duie parolle : culunizadori fora ! Culunizati
rivolta !
Antone Filippi
