Studià, un mezu di fassi
valè da individuu, da membru
d’una cullitività, d’esse
« capace ». Per a nazione
corsa, a dicia Pasquale
Paoli, una passione maiò.
Dassi un solcu sicuru, quellu
di a cultura, o bramà di
pudè piglià, cumu si dice
avà, « l’ascensore suciale »,
sia cum’ella sia campemu
torna una crisa tamanta.
Pruvemu à parlanne senza
à priori o lingua di legnu.
Insignante eiu stessu,
senza mai dismette d’amparà,
aghju cunnisciutu altri
tempi : più « certificatu di i
studii », ma esame per
entre ind’è a sesta, è per a
maiò parte d’i zitelli, i limiti
di u « corsu cumplimentariu
», o l’accessu à l’insignamentu
« primariu supiriore
». U liceu era risirvatu
à uni pochi, sia abbastanza
ricchi per pagà, sia abbastanza
astuti per riesce à l’esame
di e borse, senza
puru esse sicuri di a gratuità…
Tandu si ch’ella tuccava
à i genitori à fà « sacrifizii
», è à i figlioli à studià, è
basta !
In quantu à i stabilimenti,
à livellu sicundariu, campavanu
tutti più o menu
cum’elli campanu avà i licei
parighjini sempre rinumati
(Henri IV, Louis-le-Grand,
ST Louis, Fénelon…). Ci hè
statu dipoi un veru terramotu,
è ci perdimi ind’è i
sigle indittendu « les établissements
difficiles », o i
rimedii messi in ballu per
cusì pocu tempu (C.P.E,
C.D.I, C.D.D., C.N.E., eccetera)
senza mintuà u listinu
di i ministri fiascati, da
Faure (68), Haby, Savary,
Monory, Devaquet, à de
Villepin, longu à crise
senza vere surtite.
Vultemu appena in daretu,
è lighjimu e testimunianze,
u vissutu, di prufissori
in cunfrontu incù a rialità
ughjinca, certi à l’addisperu,
è da l’altra banda,
i rimedii ch’ellu prupunia
d’Aprile 2003 u ministru di
tandu. Si tratta di « Sale
prof ! » (Nicolas Revol,
1989), di « Entre les murs »
(François Begaudeau,
2006), « La fabrique du crétin
», (2006), è… « Lettre à
tous ceux qui aiment l’école
» (Luc Ferry, 2003).
Dimmula subitu. Ch’ella
sia ind’è u L.E.P d’insignamenti
prufissiunale di
Revol, o ind’è u culleghju
d’insignamentu generale di
Begaudeau, rege l’assurdu
(ab ordine) ind’è u sensu
chì, a suprana, a piglianu
pocu à pocu l’allevi, è chì
u linguaghju di l’insignanti
avvicina l’ « adolangue »,
sia trà di elli, sia in tempi
di scambii verbali incù l’altri.
Ferma quantunque, in
dispettu di l’incivilità, un
certu affettu, un certu
sensu di l’umore. Ridicule
in sè stessu, u verlan, u
céfran, hè propiu lingua
viva ! Pare ch’elli ghjuchessini
ugnunu a so parte,
incù enfasi ; é l’ultimu
ricorsu, « sur l’Coran d’la
Mecque ! » per esse criduti
è rispittati. Sempre sempre,
u cultu di « les marques »,
« les slogans » (« All star,
Love me twice, I love
Ungaro, ecc…). Parenu
appena più civili i sgaiuffi
di Begaudeau (omancu
quelli chì priparanu u brivettu)
: più radicali, quelli
di Revol : « ils ne gomment
pas, ils déchirent ».
Gnoccaru, avagnulu,
calambrone, zucca, sporta…
ùn mancanu e parolle
per « le Crétin », chì saria,
à credicei Brighelli, u pruduttu,
forse vulsutu, d’una
scola muribonda forse
dighjà morta, spechju di
l’abissu suciale trà l’ « alphas »
(chì t’anu u putere) è
« l’epsilone » (sottumessi, è
mantinuti ind’è l’imbecillità).
Ultime parolle di speranza
tistarda : « Le crétin,
pas une fatalité. Pas encore…
».
Chì fà ? Pruposte da a
parte di i studienti, di i sindicati,
di i « leaders »,
poche è micca… À « u risicu
di passà da « riazziunariu
», parla Brighelli di
« rimette i zitelli à u travagliu
», di « risturà a disciplina
», di « fà passà sicondu
à u meritu », di « fà ch’ellu
sia torna u basciglié un
esame seriu », è, al di là di
l’istituzione, di… cambià u
versu di l’insignanti, chì
« n’importe qui ne peut pas
être enseignant ». Altru
brevariu, a « lettara » di
Luc Ferry : ne fecenu certi
insignanti un « autodafé »,
senza mancu leghjela.
Prupunia 10 riforme di primura
: privene è cuntrullà
l’illettrisimu rivalurizà a vita
prufissiunale – cumbatte u
fiascu à livellu universitariu
(primu ciclu) – luttà contru
l’incivilità é a viulenza in
iscola – esse più attenti à
l’handicap – favurì l’indiatura
di i ghjovani – migliurà
a furmazione di l’insignanti
– permette più di mubilità
à i studienti, è ricunnosce i
diplomi europei, dendu à
l’università più d’autunumia…
ecc.
Ma pare ch’elli sianu i
Francesi sempre in brama
di « réformite », senza puru
vulè cambià a minima cosa.
Viaghja male a Francia.
Viaghja male a scola. Ún si
tratta micca di ghjastimà u
slanciu, di... maghju 68 per
noi vechji rivuluziunarii,
ma di ricunnosce i limiti
d’una certa etica permissiva
è edonista. In tempi di
grilli, s’impone una riflissione
soda, per rifundà una
sucità, divintata multiculturale,
ferita da e piaghe di u
disimpiegu, di l’odiu, di u
“no future”, di a nustalgia
pocu fattiva di tempi andati.
Suluzioni – miraculi,
micca ! Si pò sempre sugnà
incù Vivian Forrester
(« L’horreur économique »,
1997) à « l’audace d’un
sentiment âpre, ingrat,
d’une rigueur implacable,
et qui se refuse à toute
exception, - le respect ! »
Anghjulamaria Carbuccia.
