Incù dui ghjurnali in pocu tempu, a stampa corsa s’impreziosa. Issa ricchezza stampata
vena à dì chì soffia ind’è noi una voglia di sprissioni altra è corsa, girata versu
l’avvena. Soffia dinò, à malgradu a tentazioni autoritaria di u sistemu francesu, un aria
di libartà.
Asisti più chì mai issa tentazioni
autoritaria francesa ! È ci voli à
rammintà à quiddi chì ricusani o chì
sminticani troppu in furia, ciò chì si
era passatu pà « u Ribombu di a
Corsica Nazioni ».
Arricurdemuci chì u ministru francesu
di l’internu Nicolau Sarkozy
circaia à ammutulì, à u mumentu
induva si facia una dimarchja
d’unioni pulitica, u muvimentu
publicu di libarazioni naziunali,
mittendu in prighjò dopu à una
campagna di criminalisazioni,
parechji militenti di Corsica
Nazioni Indipendenti frà i quali dui
rispunsevuli, è un direttori di publicazzioni
di un ghjurnali indipendentistu
« u Ribombu di a Corsica
Nazioni ». U so scopu era dinò di
fà spariscia di a stampa in Corsica,
a voci di quiddi chì pensani un lindumani
di sbuccera pulitica fora di
a Francia. Pà uni pochi di mesi ùn
s’hè lettu «U Ribombu », ma ùn hè
sparitu u ghjurnalisimu indipendentista.
U Ribombu
intarnaziunali
A storia di « u Ribombu » rammenta
à ugnunu chì à malgradu tutti
i culpacci accaduti, ùn s’hè mai
spintu u spiritu ghjurnalisticu
indipendentista. I militanti è i ghjurnalisti
chì ani cuntinuatu ciascunu à
a so manera di participà a mantena
un ghjurnali l’ani fatta senza piantà
ne menu cambià !!! U ghjurnali
era, è hè sempri - è più chì mai - di
quiddi chì pensani chì a Corsica ùn
pò campà chì libara è maestra di u
so destinu. È a so piazza l’hà ottinutu
fora di issu spaziu mediaticu
manighjatu da a putenza di l’occupanti.
Una stampa
manighjata...
Basta à sapè comu u ministru
attuali di l’Internu in Francia prova
à ammaistrà pà contu soiu a stampa
piazzendu i soi ind’è tutti i spazi
ghjurnalistichi ch’iddi sighini scritti,
parlati, o à a televisiò... Ùn circemu
in altrò ciò chì idd’hè una dimucrazia
sviata di i so fundamenti
comu u drittu à a libartà di a
stampa...
Escia
“A Cuscenza”
È oghji, alora chì li piaci à issu
stessu ministru di l’internu di dì chì
u muvimentu naziunali hè indibulitu,
a nova surtita à u niveddu di a
ghjuventù corsa, di un misincu
smintiscia issi ditti arrabiati. U
ghjurnali chjamatu « cuscenza »
traduci un rinfurzamentu di i ghjovani
indipendentisti è di i so strutturi,
più particularmenti quidda di
« A Ghjuventù Indipendentista ». U
niveddu di i scritti moscia bè un
ingaghjamentu misuratu è chjaru,
piacevuli à leghja
È volta
« a Nazione »
Ritruvemu un altru ghjurnali,
misincu. Era nanzi un fugliettu chì
si truvaia ind’è « u Ribombu intarnaziunali
». Avali hè una squadra
nova, cundutta da Ghjuvan Guidu
Talamoni, chì ripidda a scumissa
mittendu in vendita un ghjurnali
micca militenti, ma d’infurmazioni,
d’inchiesti, di ricerca, di sprissioni è
di riflessioni in lingua nustrali cù
l’aiutu è a participazioni di ghjenti
d’orizonti sfarenti. A scumissa hè
monda impurtanti è arradichighja a
stampa litteraria corsa.
Cumu un soffiu di libartà !
Al di là di issi surtiti tistimoni di
l’arradicamentu puliticu è culturali
di quiddi chì pensani a Corsica
secondu a so identità, a scumessa hè
di mantena è di rinfurzà issi ghjurnali
dimustrendu a ricchezza di u
pinsamentu fora di e leghje di l’ordini
in piazza. Accant’à « Arritti »,
« a Fiara », « u Taravu », « u
Scoddu », « u Ribombu » o
« Rivoluzione », « Cuscenza » è « a
Nazione » participighjani à a so
manera à u riacquistu puliticu è culturali.
Hè comu dici Canta u
Populu Corsu, « com’è un soffiu di
libartà ! »
Ulivieru Sauli
