Sò parechji urganisazioni, muvimenti, partiti, associi, gruppi è parsunalità chì ani chjamatu
à falà in carrughju, ma s’idda c’era u mondu ùn era quiddu aspittatu chì mancaia monda
ghjenti. A mossa era quantunqua un successu : più di 1500 parsoni sò venuti à manifestà.
Si dici sempri chì d’estati hè dura di
mubilizzà. À a vista di a manifestazzioni
issu sabatu l’ottu di luddu si pò
dì chì hè vera : ci vulia à essa più
numarosi pà muscià chì in issu paesi
a cuscenza ci hè pà dì nò à a vendita
di u nosciu liturali.
Una chjama pupulari
Eppuri sò stati parechji i chjami dati
à a stampa, ch’iddi sighini pulitichi,
culturali, associativi o altri. Ma cum’è
l’hà sottuliniatu unu di i portavoci u
ghjornu di a manifestazioni, a stampa
ùn hà fattu u so travaddu è ùn hà
musciatu a rialtà di a mossa pupulari
chì era daretu à a voci lampata pà a
difesa di u liturali.
I dimenticanzi
di
« Corse-matin »
Hé dunqua cù ghjustezza
chì i portavoci di l’urganisazioni
di issa manifestazioni
ani criticatu à «
Corse-Matin » è ci vularia à
vultà nant’à u rolu di issu
ghjurnali chì participighja à
ingannà l’upinioni in
Corsica. Issa critica publica
s’appoghja nant’à a piazza
chì hè stata data à l’articuli
chì chjamaiani à manifistà :
pocu èmicca !
A rialtà di i
divergenzi
Si i chjami sò stati numarosi,
ùn poni piattà i divergenzi
chì asistini nant’à issa
leggi liturali. Si i partiti
francesi di manca, uni pochi di furmazioni
naziunalisti, è associi di u
circondu ricunnoscini issa leggi, ùn
hè u parè di Corsica Nazioni
Indipendenti chì ind’è un cummunicatu,
chì ben sicura ùn hè statu
stampatu comu tant’altri, hà spiegatu
chjaramenti u so parè nant’à a so prisenza
à a manifestazioni.
Al di là d’ issa leggi
Pà Corsica Nazioni Indipendenti, ci
voli à andà più in davanti, sfrancà
issa leggi chì hà i so limiti pulitichi.
A difesa di u solu liturali s’idda participighja
di una certa manera à a difesa
di a tarra ùn pò micca impidiscia
sicondu a so struttura ghjuridica a
quistioni di u spussessu e di a culunisazioni
di pupulamentu. A nuzioni
i di novi paisoli missa in rilevu ind’è
issa leggi francesa poni monda intarrugazzioni.
Eccu parchì mittimu
appenu più sottu un cumunicatu
interu di Corsica Nazioni
Indipendenta.
E’ a mossa pà a difesa di a tarra ùn
si pò arristà à issa manifestazioni chì
a tarra ùn s’arresta à u liturali ! Ancu
l’internu hè minacciatu da monda
cumpradori urganizati… Tocca di
fattu à l’insembu di u muvimentu
patrioticu à metta in ballu un’andatura
di mubilisazioni pà rammintà à
tutti chì issa tarra hè noscia è nimu
ùn a si pò cumprà !
Lavighju Piomu
