A nicissità di l'unioni pulitica di u muvimentu naziunali
L'unioni pulitica di u muvimentu naziunali
hè una nicissità, una tappa ind'è
u prucessu di libarazioni naziunali,
una sfida di pettu à a putenza di u
Statu culuniali. Ùn si tratta micca quì,
ben'intesu, di l'unità mitica di u populu
corsu, parchì quissa l'unità hè una
bugia storica, una fola cuntata pà
sparghja l'idea ch'iddu ci saria un
populu corsu senza cuscenza naziunali,
vali à di, un populu cundannatu
à campà fora di storia. À u cuntrariu,
l'avvena di un populu hè liatu à a so
capacità d'intriccià sognu è cuscenza.
È ci n'avvidimu oghji più chè mai
quandu, par asempiu, l'esecutivu di
l'assemblea di Corsica ricusa di ragiunà
di l'affari istituziunali. Di fattu,
suttumissu ch'iddu hè à u guvernu
francesu, ùn faci chè aiutà a Francia
ind'è a so impresa, quidda di fà
smariscia u populu corsu.
Eppuru, l'alittori corsi o a maiò parti di l'alittori
chì l'ani fatti, di sicuru, ùn voli micca
smariscia da populu ! Mà da u sintimu
à a cuscenza, a strada hè mal'
andatoghja è ghjustappuntu, tocca quì
à u muvimentu naziunali d'aiutà u
populu corsu à saltà u fossu, à fallu
capiscia chè fora di maestria di a
leggi, ùn ci pò essa benistà è avvena
cumunu ancu di menu. Hè quì u
sensu fundu di l'unioni pulitica. L'unioni
hè stata cuncipita pà aduniscia
tutti quiddi chì, in Corsica adupraiani
listessi parolli pà difiniscia u cuncettu
di populu o quiddu di nazioni è dinò
pà prupona subitu subitu un' alternativa
à un sistema puliticu in mani à u
partitu francesu. Un' oparata chì u
Statu francesu tema è ùn si scurda
micca di falla sapè. Da u principiu di
a pulitica di l'unioni, a so prupaganda
ammaistrata da u ministru di l'internu
hà pugnatu di spiccà trà naziunalisti u
bravu da u gattivu, cum'è si i corsi ùn
cunnisciani micca i soi. Hè da monda
chì omu sà chè a maffia è i puteri si
sentani cum'è dui campani.
È in Corsica, tutt'ugnunu sà quali chì t'hà u
puteri dapoi anni è anni. In fini, u
muvimentu naziunali, iddu, ùn s'hè
micca laccatu intrappulà da u discorsu
ufficiali. Mà saria dinò una trappula, si
à rombu di circà un accunsentu
puliticu, i cumpunanti di l'unioni naziunali
rinunciaiani à i so scelti sputichi,
à prò di a sola indiatura ind'è u spaziu
puliticu nicissariamenti limitatu di
l'assemblea di Corsica. Certu, omu sà
chè l'unioni s'hè data una struttura
naziunali pà pudè aghjiscia in fora di
l'Assemblea. Mà cum'è si sà dinò chè i
cosi longhi duventani sarpi, meddu
saria di dalla fiatu senz'aspittà.
Pà ciò chì tocca à Corsica Nazioni
Indipindenti, ogni spaziu di lutta ci
devi pirmetti di muscià a cuntradizioni
funda d'intaressi trà u Statu francesu è
a Nazioni corsa, ma al di là di u cunflittu
storicu sempri à risolva, a natura
stessa di un Statu à u sirviziu di l'ordini
ecunumicu mundiali, c'impona una
riflissioni annant'à a sucità chè no
vulemu pà issu paesi. Saria un sbagliu
maiò di pinsà chè no saremu sempri à
tempu di cunfruntassi à issa prublematica.
Più di trenta anni fà, si dicia
dighjà chè a Corsica era vittima di un
doppiu sfruttamentu : di tippu culuniali
è capitalistu. Oghji, si l'aduprera
di u linguaghju puliticu hè cambiata, a
rialità suciali idda, và pighjurendu. È
ci n'avvidimuche i segni maiò di a
noscia civilisazioni corsa, cum'è u
sapè fà, a lingua o l'ambienti… sò
minacciati da un sistema ecunomicu
chì riduci l'omu à a so capacità di
cunsumà. È quì, ùn ci pò essa chè un
Statu corsu indipindenti pà piddà a
pratesa di u drittu di issu populu di
campà sicondu u so vulè. Eccu u parè
di Corsica Nazioni Indipindenti. Ùn hè
micca quiddu di u muvimentu naziunali
sanu.
L'appuntamentu auropeu scursu, ci hà
insignatu quantu erani diversi l'analisi
di punta à i quistioni pulitichi è
suciali. Diciariamu, ancu di grazia !
Parchì u pinsà unicu, à curtu andà,
indibbulisciaria l'unioni.
Dumenicu Tognotti
