À l’iniziativa di u Cumitatu di
Balagna d’Unione Naziunale, u sei
d’aprile scorsu ci hè statu una riunione
publica in Calvi incù l’eletti
d’Unione Naziunale à l’Assemblea di
Corsica. U scopu d’issa riunione era
innanzu tuttu d’andà à l’incontru di a
pupulazione Balanina per esse à l’ascoltu
di i so prublemi è dinù di sapè
ciò chì li tene à core, vistu à situazione
attuale di u nostru paese.
A salla « A Stanza » di u « VVF A
Balagna » era piena à tapu (più di
150 persone). Avianu pigliatu piazza
à a tribuna Nadine Nivaggioni,
Ghjuvan Cristofanu Angelini,
Ghjuvanni Biancucci, Ghjuvan Guidu
Talamoni, Stefanu Serra è Francescu
Simeoni di u Cumitatu. Eranu prisenti
ind’è a salla : Alanu Mosconi è
Ghjuvanni Brignole di u STC.
Dopu à l’introitu in lingua corsa di
Francescu è di Stefanu pè à prisintazione,
l’eletti anu parlatu di u so travagliu
à a CTC, di i so voti per ciò
chì cuncerna a lingua corsa, l’energia,
i trasporti, a privenzione contr’à i
fochi, u bugettu è di u so pinseru
maiò pè u PADDUC (Pianu d’accunciamentu
è di sviluppu durevule di a
Corsica) in priparazione chì ingagiarà
l’avvene di a Corsica per l’anni à
vene. Anu datu torna u so parè
annant’à u funziunamentu di
l’Assemblea è l’incapacità di quelli
chì sò à capu di regge è di guvarnà
senza l’aiutu di Parigi è di Zuccarelli !
È chì più chè mai a francisata cuntinueghja.
Una volta fattu issu bilanciu hè
principiatu u dibattitu incù u publicu
è e so quistione sopratuttu annantu à
a situazione ecunomica è suciale di a
Corsica, oghje gattivissima (pricarità
per ùn dì miseria) ; e difficultà di a
giuventù corsa per campà ind’è u so
paese (impiegu è alloghju) chì venenu
da a spiculazione fundiaria ; u
spusessu di a nostra tarra è l’impieghi
chì sò dati à i furesteri ; a sorte
pessima di i patriotti incarcerati sempre
luntanu da i soi malgratu e prumesse
; a fine di l’arristati Miot (2010)
è e falze scrizzione annant’à e liste
alitturale...
I participanti primurosi è pinsirosi
di l’avvene di i so figlioli annantu à
so tarra si sò arricumandati à Unione
Naziunale per chere subitu misure
spicifiche per sorte d’issa situazione.
A risposta hè stata, chì solu a citattinanza
corsa (10 anni di risidenza
cuntinua in Corsica) cum’è in d’altre
isule auropeane (Isula d’Aland)
puderia risolve una grande parte di
issi prublemi. È chì issa pruposta sarà
prestu messa in dibattitu à
l’Assemblea. Ma ch’ellu ci vulera per
strappalla chì tutti i corsi si dianu di
rimenu.
Nulla di novu sottu à u celu di
Balagna, hè statu torna quistione, di
u campu d’aviazione di Santa
Catalina, di l’Amu di Calvi, di e strade,
di a mancanza di un centru di
furmazione pè a giuventù, di salle di
spittaculu è d’installazione spurtive.
Ci hè da dumandassi ciò ch’elli facenu
i capizzoni d’issu rughjone è u so
capicochja Santini, complici di a pulitica
culuniale di u statu francese. Sò
più e parolle è e prumesse cà i fatti !
Basta à vede induv’ella ne hè a custruzione
di l’antenna medicale di
Calvi lasciata in pianta dipoi un annu
da un’intrapresa in fallita ! È chì ne
pensa l’arki Zuccarelli, prisidente di
u cunsigliu d’amministrazione di
l’uspidale di Bastia, dunque rispunsevule
d’issu fattu ? Ellu chì hè sempre
prontu à mandà i patriotti in galera,
quì ùn si sente. Soga à a coda carca !
U Cumitatu d’Unione Naziunale di
Balagna si mubilizarà cum’elli fecenu
i naziunalisti d’aostu di u 1976 per fà
apre l’antenna attuale è per ch’ella
finisca sta cumedia.
À a fine d’un dibattitu passiunante è
passiunatu, innanzu di manghjà un
buccone anu tuccatu tutti inseme i
participanti u bichjeru di l’Unione, di
à fratellanza, di a generusità è di u
sustegnu fidu à i patriotti incarcerati
è e so famiglie. Cum’è sempre e voce
di l’amichi i Chjama Aghjalesi anu
incantatu tutta a sirata.
Issu scontru hè statu una riescita.
Hà permessu di ritruvà l’amichi di
Balagna, ma dinù di piglià u polzu di
u nostru populu. Per contu meiu mi
pare oghje nicissariu di fanne u tantu
in ogni rughjone.
Francescu Simeoni
